संजय जाधव

Samruddhi Mahamarg News:

समृद्धी महामार्गावर सातत्याने अपघाताच्या घटना घडत आहेत. वाहनांची वेग मर्यादा न पाळल्याने तसेत टायर फुटल्याने आतापर्यंत अनेकांना या महामार्गावर आपला जीव गमवावा लागला आहे. अपघाताच्या वाढत्या संख्येमुळे नागरिकांच्या मनात भीती बसली असून अनेक जण या महामार्गाने प्रवास करणे टाळतायत. अशात आता समृद्धीवर चोरट्यांनी धुमाकूळ घातला आहे. (Latest Crime News)

समृद्धी महामार्गाने प्रवास करताना चोरटे दुसऱ्यांच्या वाहनासमोर आपले वाहन आणून त्यांना थांबवत आहेत. तसेच त्यांच्याकडून पैसे, दागिने यांसह असलेला सर्व मुद्देमाल लंपास करतायत. या घटनांमुळे नागरिकांना समृद्धीवरुन प्रवास करणे आणखीनच कठीण झाले आहे.

जालना जिल्ह्यातील बाबुराव फुके यांच्यासोबतही अशीच घटना घडली. मात्र पोलिसांच्या सतर्कतेने चोरीला गेलेली सर्व रक्कम परत मिळाली आहे. फुके आपल्या कारने छत्रपती संभाजी नगरकडे समृद्धी मार्गाने जात होते. यावेळी मेहकर टोलनाक्याजवळ पाठीमागून आलेल्या तीन आरोपींनी त्यांच्या कारसमोर आपली कार उभी केली.

नंतर चोरट्यांनी फुकेंना जीवे मारण्याची धमकी देऊन त्यांच्याकडील १ लाख २० हजार रुपये रोख आणि मोबाईल असा मुद्देमाल चोरी केला. याप्रकरणी २४ ऑगस्ट रोजी मेहकर पोलिसात गुन्हा दाखल करण्यात आला होता, त्यावरून पोलिसांनी तांत्रिक दृष्ट्या तपास करून अनुक्रमे जालना व छत्रपती संभाजी नगर येथील गजानन, अनिल, राजेश यांना पोलिसांनी अटक केलीये.