मनोज जयस्वाल, वाशीम

Samriddhi Highway Accident: समृद्धी महामार्गावर अपघाताची एक मोठी दुर्घटना घडली आहे. यामध्ये कार आणि नीलगायीची धडक झाल्याने कारमधील ३ जण गंभीर जखमी झाले आहेत. तसेच या अपघातात नीलगाय सुध्दा गंभीर जखमी होऊन रस्त्याच्या कडेला फेकली गेली. (Accident News)

अपघातासंबंधी मिळालेल्या अधिक माहितीनुसार, वाशिमच्या मंगरूळपीर तालुक्यातील पांगरी (महादेव) येथे हा भीषण अपघात झालाय. अपघातानंतर जखमी व्यक्तींना तात्काळ रुग्णालयात दाखल करण्यात आले. मात्र नीलगाय रात्रीपासून रस्त्यावर वेदनेत व्हिवळत पडलेली असून अद्याप नीलगायीला उपचार मिळालेला नाही.

समृद्धी महामार्गाच्या दोन्ही बाजूंनी दाट जंगल आहे. त्यामुळे येथून वन्य प्राणी येण्याची दाट शक्यता आहे. प्राण्यांमुळे कोणतीही दुर्घटना घडूनये यासाठी महामार्गावर कंपाऊंड वॉल बसवलेली आहे. पण तरी नीलगाय महामार्गावर आली तरी कशी? असा प्रश्न येथे निर्माण होतोय.

समृद्धी महामार्गावर बसवण्यात आलेल्या वॉलचे काम अद्याप अपूर्ण आहे. अनेक ठिकाणी सलग भिंत नसल्याने त्यातून वन्यजीव ये-जा करतात. त्यामुळे एक महिन्यापूर्वी देखील तब्बल १७-१८ रानडुक्कर अक्षरशः चिरडले गेले होते. मानवासाठी तत्काळ धावून जाणारी समृद्धीची यंत्रणा मुक्या जीवासाठी आडमुठे धोरण का करतेय असा प्रश्नही उपस्थित होत आहे.