छत्रपती संभाजीनगर : उन्हाची तीव्रता दिवसेंदिवस वाढत आहे. संभाजीनगर जिल्ह्यातील तापमान ४३ अंशाच्या वर पोहचले आहे. मात्र ४३ अंशावरच्या रखरखत्या उन्हात तब्बल ३०० फूट दरीत उतरून पिण्याच्या पाण्यासाठी जीवघेणी कसरत करण्याची वेळ संभाजीनगर जिल्ह्यातील ग्रामीण भागात आल्याचे पाहण्यास मिळत आहे. 

मराठवाड्यात (Marathwada) सध्या भीषण दुष्काळाची परिस्थिती निर्माण झाली आहे. हजारो टँकर मराठवाड्यांच्या रस्त्यावर दिसतायत. मात्र अनेक अशी गाव आहेत; ज्या गावातला टँकरचा आधार आहे ना नळांचा आधार आहे. अशा गावातील नागरिकांना आपला जीव धोक्यात घालून हंडाभर पाण्यासाठी खोलदरीमध्ये उतरावे लागत आहे, अनेक किलोमीटर वणवण भटकंती करावी लागत (Water Scarcity) आहे. असेच काहीसे चित्र संभाजीनगर जिल्ह्यातील सोयगाव तालुक्यात सध्या पाहण्यास मिळत आहे. 

छत्रपती संभाजीनगरच्या (Sambhajinagar) सोयगाव तालुक्यातील सावरखेडा पांढरी गावातील नागरिकांना पिण्याच्या एक हंडा पाण्यासाठी सुमारे ३०० फूट खोल डोंगरात उतरून डोंगरातून येणाऱ्या झऱ्याचे पाणी आणावे लागते. दुष्काळाची ही दाहकता शब्दांपलीकडे आहे. हंडाभर पाण्यासाठी दोन- दोन तास उन्हात वाट काढून डोक्यावर घागरी घेऊन डोंगर चढून घरी यावे लागते. गावात टँकर येत नाही, टाकीमध्ये पाणी नाही, नळाचा पाण्याचा उपयोग नाही; अशा परिस्थितीमध्ये या एक फुटाच्या झऱ्यावर या गावकऱ्यांचे सर्व जीवन मरण अवलंबून आहे.