छत्रपती संभाजीनगर : दसऱ्याच्या मुहूर्तावर सोने- चांदी खरेदी केले जात असते. त्यानुसार या मुहूर्तावर आईसाठी दागिने बनविण्याचे स्वप्न होते. त्यानुसार दागिने खरेदी करण्यासाठी व्यावसायिक असलेला मुलगा रक्कम घेऊन मार्केटमध्ये गेला होता. मात्र गाडी पार्किंगमध्ये लावली असताना एकाने गाडीची डिक्की तोडून यात ठेवलेली २ लाख ८५ हजार रुपयांची रक्कम लंपास केल्याची घटना समोर आली आहे. 

छत्रपती संभाजी नगर शहरातल्या क्रांती चौक- उस्मानपुरा रस्त्यावरील एका शोरूम बाहेर भर दिवसा घडलेल्या या धाडसी चोरीमुळे शहराच्या सुरक्षिततेवर प्रश्नचिन्ह निर्माण झाले आहे. दसऱ्याच्या दिवशी मार्केटमध्ये वर्दळ होती. तर याच दिवशी आईसाठी दागिने खरेदी करण्यासाठी व्यावसायिक कपिल खंडागळे हे रक्कम गाडीच्या डिक्कीत ठेवून मार्केटमध्ये गेले होते. त्यानिशी पार्किंगमध्ये गाडी पार्क केली होती. 

डिक्कीचा लॉक तोडून रक्कम लांबविली 

पार्किंगमध्ये मोपेड गाडी लावलेल्या ठिकाणी एकजण फोनवर बोलत चकरा मारत होता. यात संधी मिळताच त्याने गाडीची डिक्कीचा लॉक तोडला. यानंतर यात २ लाख ८५ हजार रुपयांची असलेली रक्कम घेऊन चोरटा पसार झाला आहे. काही वेळाने व्यापारी कपिल आला असता त्याला गाडीची डिक्की उघडी असल्याचे दिसून आले. डिक्कीत पहिले असता रक्कम ठेवलेली पिशवी गायब झाल्याचे दिसून आले. 

घटना सीसीटीव्ही कॅमेरात कैद 

दरम्यान हा सर्व प्रकार शोरूममधील सीसीटीव्ही कॅमेऱ्यात कैद झाला आहे. यानंतर कपिल खंडागळे यांच्या तक्रारीवरून उस्मानपुरा पोलिसांनी अज्ञात चोरट्यांविरुद्ध गुन्हा दाखल करण्यात आला असून सणासुदीच्या काळात झालेल्या या घटनेमुळे पोलिसांच्या कार्यक्षमतेवर प्रश्नचिन्ह निर्माण झाले आहे.