रामू ढाकणे 

छत्रपती संभाजीनगर : छत्रपती संभाजीनगर महापालिकेला दरवर्षी मालमत्ता कर आणि पाणीपट्टी वसुलीचे उद्दिष्ट पूर्ण करण्यात अपयश येत असल्यास चित्र आहे. परंतु यंदा कर भरणाऱ्यांनाच कंत्राट देण्याचा निर्णय महापालिका प्रशासकांनी घेतला आहे. अर्थ कर न भरणाऱ्या ठेकेदारांना हे कंत्राट दिले जाणार नाही. 

संभाजीनगर (Sambhajinagar) महापालिकेकडून यंदा कर वसुलीसाठी पालिका प्रशासनाने एक विशेष मोहीम राबविण्यास सुरुवात केली आहे. त्यासोबतच मालमत्ता कर आणि पाणी पट्टी थकविणाऱ्याना महापालिका आता विविध कामांचे कंत्राट देणार नसल्याचा निर्णय प्रशासक जी श्रीकांत यांनी घेतला. अर्थात महापालिकेची कर वसुली अधिक व्हावी यासाठी पालिका प्रशासकांनी हा निर्णय घेतला आहे. 

महापालिका निवडणुकीत विजय झाल्यानंतर प्रत्येक नगरसेवक हे आपापल्या वार्डातील विकास कामांचे कंत्राट स्वतःच्या मर्जीतील ठेकेदाराला मिळवून देत होते. शिवाय मागील काही वर्षांपासून नगरसेवकच कंत्राटदार बनल्याचे चित्र मनपात दिसून आले. त्यामुळे जर कर थकलेला असेल, तर अशा ठेकेदारांना आता मनपाकडून कंत्राट मिळणार नाही; असा इशाराच प्रशासकांनी दिला आहे. त्यामुळे राजकीय नेत्यांच्या मर्जीतील ठेकेदारांच्या अडचणी आता वाढण्याची शक्यता आहे.