अलिकडेच 'दोन्ही राष्ट्रवादी गट एकत्र यायची वेळ आल्यास आम्ही भाजपच्या वरिष्ठ नेत्यांचा सल्ला घेऊ' असे वक्तव्य राष्ट्रवादी काँग्रेस अजित पवार गटाचे प्रदेशाध्यक्ष सुनील तटकरे यांनी नुकतेच केले होते. यावर प्रत्युत्तर देताना राष्ट्रवादी काँग्रेस शरद पवार गटाचे आमदार रोहित पवार यांनी कृषीमंत्री माणिकराव कोकाटे यांचा एक व्हिडिओ सोशल मीडियावर शेअर करत सत्ताधाऱ्यांवर निशाणा साधला.

रोहित पवार यांनी सोशल मीडिया (एक्स)वर एक पोस्ट शेअर केली होती. यात त्यांनी कृषीमंत्री माणिकराव कोकाटेंचा व्हिडिओ शेअर केला होता. या व्हिडिओ कोकाटे सभागृहात दिसत असून, ते रमी खेळत असल्याचं स्पष्ट दिसून येत आहे. त्यांनी हा व्हिडिओ शेअर करत कॅप्शनही दिला आहे.

त्यांनी आपल्या पोस्टमध्ये म्हटलं की, 'जंगली रमी पे आओ ना महाराज.. खरंतर सत्तेतल्या राष्ट्रवादी गटाला भाजपाला विचारल्याशिवाय काहीच करता येत नाही. शेतीचे असंख्य प्रश्न प्रलंबित असताना, राज्यात दररोज ८ शेतकरी आत्महत्या करत असताना देखील, सभागृहात काहीच काम नसल्यामुळे कृषीमंत्री कोकाटे यांच्यावर रमी खेळण्याची वेळी येत असावी' असा खोचक टोला त्यांनी पोस्ट शेअर करत दिला आहे.

'कभी गरीब किसानो की खेती पर भी आओ ना महाराज'

'कभी गरीब किसानो की खेती पर भी आओ ना महाराज' ! रस्ता भरकटलेल्या या मंत्र्यांना आणि सरकारला पिकविमा, कर्जमाफी, भावांतराची मागणी करणाऱ्या शेतकऱ्यांचे आर्त आवाज ऐकू येईल का?, असा सवाल रोहित पवारांनी यावेळी उपस्थित केला. तसेच, 'कधीतरी शेतीवर या महाराज! खेळ थांबवा, शेतकऱ्यांना कर्जमाफी द्या..' असंही रोहित पवार म्हणाले आहेत. दरम्यान, व्हायरल व्हिडिओवर कोकाटे काय प्रतिक्रिया देणार? हे पाहणं महत्वाचं ठरणार आहे.