Buldhana News : बुलडाणा जिल्ह्यातील संग्रामपूर, जळगांव जामोद तालुक्यात झालेल्या अतिवृष्टीमळे या दोन्ही तालुक्यात पूरपरिस्थिती निर्माण झाली होती. अतिवृष्टीमुळे हजारो हेक्टर शेतीचं नुकसान आहे. तसेच घरांचे देखील नुकसान झाले असून अनेकांचे संसार उघड्यावर आले आहेत. मात्र अशी कठीण काळात पालकमंत्री जिल्ह्यात फिरकलेही नाही, त्यामुळे शेतकरी नेते रविकांत तुपकर यांनी संताप व्यक्त केला आहे.

दोन आठवडे उलटून गेले तरी नुकसानग्रस्तांना अद्याप मदत मिळाली नाही. जिल्ह्याच्या पालकत्वाची जबाबदारी ज्यांच्या खांद्यावर आहे , ते पालकमंत्री गुलाबराव पाटील साधी पाहणी करायला सुद्धा आले नाही. साधी विचारपूस देखील त्यांनी केली नाही. पालकमंत्री असंवेदशील आहेत. त्यांना जमत नसले तर राजीनामा द्यावा , अशी मागणी शेतकरी नेते रविकांत तुपकर यांनी केली आहे. (Latest News Update)

पालकमंत्री जनतेला वेठिस का धरत आहे. दुसरा पालकमंत्री असता तर काहीना काही हालचाल केली असती. मदत केली असती किमान शेतकऱ्यांना जाऊन भेटले असते. पण गुलाबराव पाटील कोणत्या काळजाचा माणूस आहे. त्यांची बुलडाणा जिल्ह्यावर वक्रदृष्टी का आहे. त्यांची बुलडाणा जिल्ह्याही काही दुश्मनी आहे का? असा सवालही तुपकर यांनी विचारला. (Political News)

गुलाबराव पाटील तुम्हाला लोकांनी निवडून दिलं आहे. विधानभवनात तुम्ही काय अंडी उबवायला गेले आहात का? अडचणीच्या वेळी पालकांनी धावून येण्याची गरज असते. मात्र गुलाबराव पाटील कुठे फरार आहेत, हे आता शोधण्याची वेळ आली आहे. जमत नसेल तर तातडीने तुम्ही राजीनामा द्या आणि एखादा कर्तव्यदक्ष दुसरा पालमंत्री बुलडाणा जिल्ह्याला द्यावा, अशी मागणी आमची आहे.