महापालिकेच्या मोर्चेबांधणीसाठी सर्वच पक्षांनी कंबर कसलीय.. त्यातच आता उद्धव ठाकरेंच्या पत्नी रश्मी ठाकरेंनी थेट उपमुख्यमंत्री एकनाथ शिंदेंना बालेकिल्ल्यातच आव्हान देण्याची रणनीती आखलीय.. आणि त्याला निमित्त ठरलंय नवरात्रोत्सवात टेंभी नाक्याच्या दुर्गेश्वरीची आरती...

रश्मी ठाकरे फक्त दुर्गेश्वरीची आरती करुन थांबल्या नाहीत.. तर त्यानंतर ठाण्यातील विविध मंडळात देवीचं दर्शन घेत शिवसैनिकांशी संवाद साधलाय... मात्र रश्मी ठाकरे टेंभी नाक्याच्या देवीला पहिल्यांदाच गेल्या आहेत का?

2022

रश्मी ठाकरेंच्या हस्ते टेंभीनाक्याच्या देवीची आरती

2023

रश्मी ठाकरेंकडून देवीची पूजा

2024

रश्मी ठाकरेंनी देवीचं दर्शन घेतलं

शिवसेनेचं ठाणं आणि ठाण्याची शिवसेना... असं बोललं जातं.. मात्र शिवसेनेच्या फुटीनंतर ठाणे जिल्ह्यावर एकनाथ शिंदेंनी आपलं वर्चस्व कायम ठेवलंय.. त्यामुळे शिंदेंच्या वर्चस्वाला शह देण्यासाठी ठाकरे बंधूंनी एकत्रित रणनीती आखलीय.. आधी उद्धव ठाकरेंनी ठाणे, कल्याण डोंबिवलीच्या पदाधिकाऱ्यांशी चर्चा केली.. तर राज ठाकरेंनीही कल्याण, अंबरनाथचा दौरा करुन वातावरण तापवलंय.. त्यातच आता रश्मी ठाकरेंनी ठाण्याकडे विशेष लक्ष केंद्रित केल्याने चर्चांना उधाण आलंय.. मात्र मुख्यमंत्रिपद गेल्यानंतर उद्धव ठाकरेंच्या पाठीशी ठामपणे उभ्या राहिलेल्या रश्मी ठाकरे आता ठाकरेंच्या अस्तित्वाच्या लढाईत शिंदेंना बालेकिल्ल्यातच शह देण्यासाठी काय रणनीती आखणार आणि खरंच शिंदेंच्या हातातून ठाणे महापालिका जिंकणार का? याकडे राज्याचं लक्ष लागलंय..