अमोल कलेय, साम टीव्ही प्रतिनिधी

Ratnagiri nagar parishad Election News : उद्धव ठाकरेंची शिवसेना सोडून एकनाथ शिंदेंच्या शिवसेनेसोबत गेलेल्या राजन साळवी यांना रत्नागिरीमध्ये मोठा धक्का बसला आहे. रत्नागिरी नगरपरिषदेच्या निवडणुकीत राजन साळवी यांच्या मुलाला उमेदवारी नाकारण्यात आली आहे. त्यामुळे कोकणात शिवसेनेतील अंतर्गत धुसफूस असल्याचे समोर आल्याची चर्चा आहे.

राजन साळवी अन् उदय सामंत यांच्यातील अंतर्गत कलहाची चर्चा कोकणाच्या राजकीय वर्तुळात सुरू आहे. मुलाला उमेदवारी नाकारल्यामुळे राजन साळवी नाराज असल्याची माहिती समोर आली आहे. रत्नागिरी नगरपरिषद निवडणुकीत मुलाला उमेदवारी नाकारल्यानंतर आता उदय सामंत आणि राजन साळवी यांच्यात शीतयुद्ध रंगणार का? अशी चर्चा सुरू झाली आहे.

राजन साळवी यांचा मुलगा अथर्व यांनाा शिवसेनेने रत्नागिरी नगरपरिषदेमधून उमेदवारी नाकारली. राजन साळवी यांचा मुलगा अथर्व राजन साळवी प्रभाग क्रमांक १५ मधून निवडणुकीच्या मैदानात उतरण्यासाठी इच्छुक होते. पण त्यांना उमेदवारी नाकारण्यात आली. अथर्वच्या ऐवजी ती जागा भाजपला सोडली जाणार असल्याचे समजतेय. अथवा भाजपमधून आयात उमेदवार करून त्याला शिवसेनेकडून उमेदवारी दिली जाणार असल्याची चर्चा रत्नागिरीच्या राजकारणात सुरू आहे.

त्यामुळे गेल्या काही दिवसांपासून सुरू असलेला रत्नागिरी नगरपरिषदेमधील प्रभाग क्रमांक 15 मधील उमेदवाराचा ट्विस्ट अद्याप कायम आहे. या जागेसाठी शिवसेनेकडून अद्याप उमेदवार देण्यात आलेला नाही. राजन साळवी यांचा मुलगा अथर्व या जागेसाठी इच्छुक आहे, पण त्यांना तिकिट नाकारण्यात आले आहे. महत्त्वाचे म्हणजे, याच प्रभागामधून राजन साळवी यांनी आपल्या राजकीय कारकीर्दीला सुरुवात केली होती. साळवी हे याच १५ प्रभागातून निवडून आले अन् रत्नागिरीचे नगराध्यक्ष झाले होते.