Rajan Salvi Shinde Shivsena : माजी खासदार राजन साळवी यांनी आज एकनाथ शिंदे यांच्या उपस्थितीमध्ये शिवसेनामध्ये प्रवेश केला. त्यांनी उद्धव ठाकरे यांची साथ सोडून शिंदे गटात प्रवेश केला. राजन साळवी यांच्या पक्षांतरामुळे कोकणात ठाकरे गटाला खिंडार पडले आहे. दरम्यान साळवी यांनी विनायक राऊत यांच्यामुळे पक्ष सोडला असे विधान केले आहे.

ठाण्यामध्ये राजन साळवी यांनी शिवसेना शिंदे गटामध्ये प्रवेश केला. पक्ष प्रवेशानंतर राजन साळवी यांनी पत्रकार परिषदेमध्ये विनायक राऊत यांच्यावर टीका केली. ते म्हणाले, 'विनायक राऊत यांच्यामुळे माझं मंत्रिपद हुकलं. ज्या राऊतांना आम्ही मोठं केलं त्यांनीच पराभव केला. मला मंत्री करावं अशी शिफारस एकनाथ शिंदे यांनी उद्धव ठाकरे यांच्याकडे केली होती. हुकलेलं मंत्रिपद मिळेल असं वाटलं होतं पण माझा पराभव झाला. २०२४ चा पराभव हा माझ्या जिव्हारी लागला. विनायक राऊतांनी आमच्या विरोधात कामं केली'

'आनंद आश्रम ही पवित्र जागा आहे. शिंदेंच्या शिवसेनेमध्ये प्रवेश करणं हे माझं भाग्य आहे. आज पक्षप्रवेशाच्या वेळी माझ्या दोन्ही डोळ्यांमध्ये अश्रू आहेत. ठाकरेंचा पक्ष सोडत असल्याने डोळ्यात अश्रू आहेत. पण शिंदेंची पुन्हा साथ मिळाल्याने आनंदाश्रू आहेत', असे वक्तव्य राजन साळवी यांनी केली. तर एकनाथ शिंदे यांनी साळवींच्या पक्षाप्रवेशावर कोकणातला ढाण्या वाघ पुन्हा गुहेत परतला असे उद्गार काढले.

हजारो कार्यकर्त्यांच्या उपस्थितीमध्ये राजन साळवी यांनी शिंदे गटात प्रवेश करत हाती धनुष्यबाण घेतले. ठाकरे गटाचे नेते विनायक राऊत आणि राजन साळवी यांच्यात सातत्याने वाद सुरु होते. यात उद्धव ठाकरेंनी राऊतांची बाजू उचलून धरली होती. त्यामुळे राजन साळवी नाराज होते. या नाराजीच्या कारणामुळेच त्यांनी ठाकरेंची साथ सोडल्याचे कबूल केले.