गल्लीपासून दिल्लीपर्यंत सगळ्यांच्या नजरा आज वरळी डोमवर होणाऱ्या विजयी मेळाव्याकडे लागल्या आहेत. १९ वर्षानंतर ठाकरे बंधू एकत्र येत हिंदी सक्तीविरोधातील कायदा रद्द केल्याबाबत विजयोत्सव साजरा करणार आहेत. एकाच व्यासपीठावर येत राज आणि उद्धव ठाकरे यांची एकत्र तोफ धडाडणार आहे. दरम्यान, या कार्यक्रमाचं स्वरूप कसं असणार आहे? भाषणाची सुरूवात नेमकी कुणापासून केली जाणार? भाषणादरम्यान, ठाकरे बंधू एकीची घोषणा होणार का? असे अनेक प्रश्न सध्या अनुत्तरीत आहेत. मात्र, भाषणाबाबत मोठी अपडेट हाती आली आहे.

विजयी मेळाव्याच्या निमित्ताने उद्धव आणि राज ठाकरे एकाच व्यासपीठावर येणार आहेत. तब्बल १९ वर्षानंतर ठाकरे बंधू एकाच व्यासपीठावर येणार असल्यामुळे या महोत्सवाला विशेष महत्व प्राप्त झाले आहे. सकाळी ११:३० वाजेपर्यंत दोन्ही बंधू वरळी डोमवर पोहोचतील. दरम्यान, या विजयी मेळाव्यात नेमके कोणते नेते भाषण करणार? याची माहिती समोर आली आहे. आजच्या विजयी मेळाव्यात दिग्गज नेते उपस्थित राहणार आहेत. प्रकाश रेड्डी, शेकापचे जयंत पाटील, सुप्रिया सुळे, राज ठाकरे आणि उद्धव ठाकरे या नेत्यांची भाषणं होणार आहेत.

जर या विजयी मेळाव्यात काँग्रेस किंवा राष्ट्रवादी काँग्रेसचे नेते आले तर, त्यांनाही भाषण करण्याची संधी दिली जाणार असल्याची माहिती आहे. सगळ्यांचं भाषण झाल्यानंतर शेवटी उद्धव ठाकरे भाषण करणार आहेत. यादरम्यान, लाखोंच्या घरात ठाकरे सैनिक या मेळाव्यात हजेरी लावणार आहेत. त्यामुळे वरळी डोममधील जागा अपुरी पडू शकते. डोमच्या बाहेरील हाजी अली, वरळीला जाणारे दोन्ही रस्ते पॅक होण्याची शक्यता आहे. त्यामुळे रस्त्यावर देखील स्क्रीन लावली आहे. राज्यातील कानाकोपऱ्यातून आता ठाकरे सैनिक वरळी डोमच्या दिशेनं प्रस्थान झाले आहे.

विजयोत्सवात ठाकरे मोठी घोषणा करणार?

१९ वर्षानंतर ठाकरे बंधू एकत्र असल्यामुळे साऱ्यांचं लक्ष आजच्या मेळाव्याकडे आहे. गेल्या काही दिवसांपासून ठाकरे बंधूंची युती होईल अशी चर्चा होती. राज ठाकरेंनी दिलेली साद आणि उद्धव ठाकरेंनी दिलेला प्रतिसाद यामुळे ठाकरे बंधू एकमेकांना टाळी देतील हे जवळपास निश्चित झाल्याचं वाटलं होतं. मात्र, अद्यापतरी टाळीचा आवाज घुमला नाही. त्यामुळे मराठीचा झेंडा खांद्यावर घेऊन ठाकरे बंधू इथून पुढची लढाई एकत्र लढणार का? याची उत्सुक्ता सगळ्यांनाच आहे.