सांगली, ता. २८ जुलै २०२४

गेल्या काही दिवसांपासून सांगली जिल्ह्यात पावसाने धुमाकूळ घातला असून पुरस्थिती निर्माण झाली आहे. जिल्ह्यातील कृष्णा नदीने इशारा पातळी ओलांडल्याने नागरिकांचा जीव टांगणीला आला होता. मात्र आता कृष्णाकाठच्या नागरिकांना दिलासा मिळाला असून कृष्णा नदीची पातळी एकीकडे 5 इंच उतरली असून पाणी स्थिर आहे.

कृष्णाकाठला दिलासा!

सांगलीमध्ये कृष्णा नदीची झपाट्याने वाढणारी पाण्याची पातळी आता संथ गतीने कमी होत आहे. कृष्णेची पातळी रात्री 40 फूट 6 इंच होती. ती पातळी 40 फूट 2 इंचावर आहे. रात्रीपासून 4 इंचने पाणी पातळी कमी झाली आहे. मात्र इशारा पातळी ही 40 फूट आहे. यामुळे कृष्णा काठच्या नागरिकांना दिलासा मिळाला आहे. जिल्ह्यात आणि नदी पाणलोट क्षेत्रात पाऊसाचा जोर ओसरल्यामुळे पातळीत होणारी वाढ मंदावली आहे.

पाणी पातळीतील वाढ मंदावली

जिल्ह्यातील एकूण 4 हजार 62 नागरिकांचे स्थलांतर करण्यात आले आहे. त्याचबरोबर जनावरांचाही स्थलांतर करण्यात आले आहे. या पुरामुळे कृष्णा आणि वारणा नदीकाठची हजारो हेक्टर शेती पाण्याखाली गेली आहे. यामध्ये भात, सोयाबीन, ऊस, आणि भाजीपाला अशी पिके पाण्याखाली गेली आहेत. त्यामुळे शेतीचे मोठ्या प्रमाणात नुकसान झाले आहे.

कोल्हापूरात परिस्थिती काय?

दुसरीकडे कोल्हापूर जिल्ह्यातही पावसाचा जोर ओसरला आहे, मात्र पूरस्थिती कायम आहे. रात्री नऊ वाजल्यापासून पहाटे पाच वाजेपर्यंत पंचगंगा नदीची पाणीपातळी स्थिर आहे. गेल्या आठवड्याभरापासून पडणाऱ्या मुसळधार पावसामुळे 95 बंधारे अद्यापही पाण्याखाली गेले असूनजिल्ह्यातील वाहतूक व्यवस्था ही विस्कळीत झाली आहे.

दरम्यान, मुसळधार पावसामुळे कोल्हापुरातील सर्वच रस्त्यांवर पुराचे पाणी साचले असून पुराच्या पाण्यासोबत मोठ्या प्रमाणात कचरा वाहून आला आहे. प्लास्टिकच्या बाटल्या, थर्माकोलसह इतर कचरा शहरातील रस्त्यांवर साचला असून सर्वत्र दुर्गंधीचे साम्राज्य पसरले आहे.