राजेश भोस्तेकर

रायगड : मुंबई, ठाणे, कल्याण महानगरपालिका क्षेत्रातील शहरात कर्मचाऱ्यांवर फेरीवाल्याकडून हल्ला झाल्याच्या घटना नेहमी घडत असतात. अशीच काहीशी घटना आज रोहा शहरात घडली आहे. वाहतुकीस अडथळा होत असल्याने दुसरीकडे बसण्यास सांगितले असता केळी विकणाऱ्या बाईने नगरपालिका कर्मचारी आणि पोलिसांसोबत हुज्जत घातली. एवढेच नाही तर या महिलेने तर दगड विटा फेकून पोलीस कर्मचाऱ्याचा कानाला आणि हाताला चावाही घेतला. रागाच्या भरात आपल्या लहानग्याला बाजूच्या विहिरीत टाकण्याचा प्रयत्नही केला ही घटना घडली आहे आज सकाळी रोहा शहरातील (Roha City) मारुती नाका परिसरात. याबाबत रोहा पोलीस ठाण्यात या महिलेविरोधात सरकारी कामात अडथळा निर्माण केल्याबाबत गुन्हा दाखल केला असून अटकही केली आहे.

रोहा शहरातील मारुती नाका हा नेहमी गजबजलेला परिसर आहे. या परिसरात रस्त्याच्या बाजूला अनेक फेरीवाले, भाजी, फळ विकणारे आपला व्यवसाय करीत असतात. मात्र त्यामुळे रहदारीला अडथळा निर्माण होत असतो. याबाबत आज सकाळी साडे अकरा वाजण्याच्या नगरपालिका कर्मचारी आणि रोहा पोलीस यांनी संयुक्तपणे कारवाई सुरू केली होती. यावेळी रस्त्याच्या कडेला बसलेली केळेवाली हिला कर्मचारी यांनी दुसरीकडे बसण्यास विनंती केली. मात्र या गोष्टीचा राग या महिलेला आल्याने तिने पोलीस आणि नगरपालिका कर्मचारी याच्याशी हुज्जत घालून शिवीगाळ करण्यास सुरुवात केली. या महिलेला महिला पोलीस कर्मचारी समजून सांगत असतानाही ती ऐकत नव्हती उलट महिला पोलीस कर्मचाऱ्याचा कानाला तर दुसऱ्या पोलीस कर्मचाऱ्याचा हाताला चावा घेतला.

एवढ्यावर न थांबता आपल्या लहानग्या मुलाला बाजूच्या विहिरीत टाकण्याचा प्रयत्नही केला. अखेर पोलिसांनी या महिलेस गाडी टाकून पोलीस ठाण्यात नेले. तिच्या विरोधात सरकारी कामात अडथळा आणल्याबाबत गुन्हा दाखल केला आहे. फेरीवाले, भाजी, फळ विक्रेता यांनी नियमांच्या अधीन राहून व्यवसाय करावा असे आवाहन उपविभागीय पोलीस अधिकारी किरणकुमार सूर्यवंशी यांनी केले आहे.

Edited By: Pravin Dhamale