सचिन कदम 
रायगड : विधानसभा निवडणुकीच्या रिंगणात उभ्या असलेल्या उमेदवारांचा जोरदार प्रचार सुरु आहे. सर्वांच्या भेटी घेऊन मतदारांना मत देण्याचे आवाहन करत आहे. दरम्यान प्रचार करण्यास सरकारी कार्यालयात जाण्यास मनाई असताना शेकापच्या उमेदवार चित्रलेखा पाटील यांनी जिल्हाधिकारी कार्यालयात जाऊन प्रचार केल्याप्रकरणी त्यांच्या आचारसंहिता भंगाचा गुन्हा दाखल करण्यात आला आहे. 

विधानसभा निवडणुकीच्या (Vidhan Sabha Election) रिंगणात असलेल्या उमेदवारांसाठी निवडणूक आयोगाने आखून दिलेल्या नियमावलीनुसारच प्रचार करणे बंधनकारक आहे. अर्थात प्रचार करताना आचारसंहितेचे पालन करणे आवश्यक आहे. यात प्रामुख्याने प्रचाराचा कालावधी व वेळ ठरवून देण्यात आली आहे. तसेच सरकारी कार्यालयात प्रचार करण्यास देखील बंदी आहे. असे असताना देखील अलिबागमध्ये शेकापच्या उमेदवाराने सरकारी कार्यालयात जाऊन आपला प्रचार केला आहे. 

अलिबाग (Alibag) विधानसभा मतदारसंघातील शेतकरी कामगार पक्षाच्या उमेदवार चित्रलेखा पाटील यांच्या विरोधात आचार संहिताभंगाचा गुन्हा दाखल करण्यात आलाय. सरकारी कार्यालयात प्रचाराला बंदी असताना चित्रलेखा पाटील यांनी अलिबाग येथील जिल्हाधिकारी कार्यालयात आपल्या कार्यकर्त्यांसह जावून तिथं आपला प्रचार केला; असा ठपका त्यांच्यावर ठेवण्यात आला. याबाबत जिल्हाधिकारी कार्यालयाकडून अलिबाग पोलीस ठाण्यात तक्रार करण्यात आली होती. त्याची दखल घेवून अलिबाग पोलीस ठाण्यात गुन्हा दाखल झाला.