पुणे : पुण्यातील सावित्रीबाई फुले विद्यापीठाच्या वसतिगृहात एक संतापजनक प्रकार समोर आला आहे. वसतिगृहाच्या जेवणात चक्क झुरळ आणि अळ्या आढळून आल्या आहेत. हा सगळा प्रकार पाहिल्यानंतर विद्यार्थ्यांमध्ये संतापाची लाट पसरली आहे. अखिल भारतीय विद्यार्थी परिषदेच्या कार्यकर्त्यांनी मेस चालकास जाब विचारून मेस बंद केली आहे.

सावित्रीबाई फुले विद्यापीठाच्या वसतिगृह क्रमांक आठ या ठिकाणी १५ दिवसात दुसऱ्यांदा जेवणामध्ये किडे सापडल्याचा प्रकार समोर आला आहे. ठेकेदाराकडून विद्यार्थ्यांच्या जीवाशी खेळ सुरू असल्याचं यावरुन दिसून येत आहे. विद्यार्थ्यांकडून वारंवार तक्रार करूनही विद्यापीठाकडून कोणतीही कारवाई होत नाही, असा आरोप विद्यार्थ्यांनी आरोप केला आहे.

दरम्यान, पुणे विद्यापीठाचा ढिसाळ कारभार पुन्हा एकदा चव्हाट्यावर आलाय. काही दिवसांपूर्वी विद्यापीठात उंदरांनी सुळसुळाट घातला होता. पण प्रशासनाकडून कोणताही उपाययोजना केली जात नाही. उंदरांनी चावा घेतल्यामुळे एक विद्यार्थी जखमी झाला होता. इतकेच नाही तर पुणे विद्यापीठातील दोन विद्यार्थ्यांना रेबिज आजाराची लक्षणं आढळून आली होती. विद्यापीठाच्या गलथान कारभारामुळे विद्यार्थ्यांमध्ये नाराजी असून आंदोलनाचा इशारा देण्यात आलाय.