Maharashtra Rain Update : पुढील ४ दिवस राज्यात जोरदार  पाऊस पडण्याचा अंदाज मुंबई प्रादेशिक हवामान विभागाने वर्तवला आहे. रायगड, रत्नागिरी आणि पुणे जिल्ह्यात 21 जुलैपर्यंत मुसळधार ते अतिवृष्टीचा 'ऑरेंज' अलर्ट जारी करण्यात आला आहे.

पालघर, ठाणे, मुंबई, सिंधुदुर्ग, जळगाव, कोल्हापूर, सातारा, औरंगाबाद, जालना, अकोला, अमरावती, बुलढाणा, वर्धा, वाशीम आणि यवतमाळ जिल्ह्यात उद्या 'यलो' अलर्ट जारी करण्यात आला आहे.

बंगालच्या उपसागरात कमी दाबाचा पट्टा निर्माण झाल्याने दोन दिवस संपूर्ण कोकणात पावसाचा जोर वाढणार आहे. तसेच संपूर्ण राज्यात पावसाची शक्यता वर्तवण्यात आली आहे. (Latest Marathi News)

पुढील 4-5 दिवस मान्सून सक्रिय राहण्याची शक्यता असून कोकण व मध्य महाराष्ट्राच्या काही भागात मुसळधार ते अतिमुसळधार पाऊस पडेल. मोसमात पहिल्यांदाच मराठवाड्यातही मुसळधारचा इशारा देण्यात आला आहे.

पुण्यात जून महिन्यात कमी पावसाची नोंद

पुणे शहरामध्ये यंदा जून महिन्यात ८३.९ मिमी पावसाची नोंद झाली आहे. गेल्या दहा वर्षांमधील या महिन्यातील हा तिसरा सर्वात कमी पाऊस नोंदवला गेला आहे. २०१४ मध्ये केवळ १३.८ मिमी पडला होता, तर २०२२ मध्ये ३५ मिमीची नोंद झाली होती. जुलै महिन्यातील १५ दिवस संपले असून, आतापर्यंत केवळ ४० मिमीची नोंद झाली असून ही गेल्या १० वर्षांमधील सर्वात कमी पावसाची नोंद ठरली आहे.