मुळशी (पुणे) : शस्त्रसाठा बाळगून तो चालविण्याचा सराव केल्याच्या आरोपावरून अटक झालेल्या आरोपीने पौड पोलिसांवर न्यायालयाची दिशाभूल केल्याचा आरोप केला आहे. या प्रकरणी  वकिलांनी देखील याबाबत दावा करत कारवाईची मागणी केली आहे. त्यानंतर न्यायालयाने पोलिस प्रशासनाला नोटीस बजावली आहे. यामुळे पोलीस प्रशासनावर ठेवण्यात आलेल्या ठपक्यात नेमके सत्य काय? हे समोर येणे बाकी आहे.  

मुळशी येथील जंगलात सात ते आठ पिस्तुलांचा वापर करून गोळीबाराची चाचणी घेण्यात आली होती. या आरोपाखाली ८ जुलैला गणेश मोहिते याला येरवडा कारागृहातून अटक करण्यात आली होती. दरम्यान व्हॉट्सअ‍ॅप कॉलच्या रेकॉर्डिंगच्या आधारे सदरची कारवाई करण्यात आल्याचे पौड पोलिसांनी नमूद केले होते. मात्र, संशयित आरोपी मोहितेसह अन्य काहींवर सासवड पोलिस ठाण्यात एका जमीन व्यवहाराशी संबंधित गुन्हा देखील दाखल आहे. 

एकाच घटनेवर दोन गुन्हे दाखल 

या प्रकरणाशी संबंधित आरोप नोंदवून पौड पोलिसांनी नवीन शस्त्र कायद्यान्वये संबंधितांविरोधात गुन्हा दाखल करण्यात आला आहे. तर सासवड येथील प्रकरणात एकास अटकपूर्व जामीन मिळाला असून, दुसऱ्याएकाला नोटीस देऊन सोडण्यात आले आहे. या सर्व बाबी आरोपीचे वकील प्रसन्नकुमार जोशी यांनी न्यायालयाच्या निदर्शनास आणून दिल्या. एकाच घटनेवर आधारित दोन गुन्हे वेगवेगळ्या पोलिस ठाण्यांत दाखल करण्यात आले. विशेष म्हणजे, सासवड पोलिस ठाण्यात दाखल गुन्ह्याचा संदर्भ वापरत पौड ठाण्यात गुन्हा नोंदवण्यात आला आहे. 

आरोपींच्या वकिलाचा कोर्टात दावा 

यात आरोपी गणेश मोहितेची पोलिस कोठडी वाढविण्याची मागणी करताना पौड पोलिसांनी अन्य सहआरोपी यांचा पत्ता शोधायचे कारण दिले. प्रत्यक्षात त्यापैकी एकाला अटकपूर्व जामीन, तर दुसरा आरोपी नोटिशीनुसार सासवड पोलिस ठाण्यात नियमितपणे हजेरी लावत आहेत. ही माहिती पौड पोलिसांनी न्यायालयापासून लपविली असल्याचा दावा बचाव पक्षाचे वकील प्रसन्नकुमार जोशी यांनी केला. दरम्यान पोलिसांविरोधात कारवाईची मागणी केली आहे. या अर्जावर प्रथम वर्ग न्यायदंडाधिकाऱ्यांनी १४ जुलैला पोलिस प्रशासनास नोटीस बजावली आहे.