रोहिदास गाडगे, साम टीव्ही

पुणे-नाशिक महामार्गावर चाकणजवळील वासुली येथे अत्यंत दुर्दैवी आणि अंगावर काटा आणणारी घटना घडली आहे. रक्षाबंधनाच्या दिवशीच एका भरधाव ट्रकने दुचाकीला चिरडल्याने बाप आणि 14 वर्षीय लेकीचा जागीच दुर्दैवी मृत्यू झाला, तर गंभीर जखमी झालेल्या आईची रुग्णालयात मृत्यूशी झुंज सुरू आहे. अपघाताचा हा थरार जवळच असलेल्या सीसीटीव्ही कॅमेऱ्यात कैद झाला आहे.

मिळालेल्या माहितीनुसार, अवसरी येथील रहिवासी असलेले राजेंद्र भोर हे आपली पत्नी आणि 14 वर्षांची मुलगी मयूरी यांच्यासह दुचाकीवरून वासुलीच्या दिशेने जात होते. पुणे-नाशिक महामार्गावरून जात असताना चाकणजवळ त्यांच्या दुचाकीचा भीषण अपघात झाला आणि त्यांची दुचाकी थेट भरधाव ट्रकखाली आली. हा अपघात इतका भीषण होता की राजेंद्र भोर आणि त्यांची मुलगी मयूरी हे दोघेही ट्रकच्या चाकाखाली चिरडले गेले. यात दोघांचाही जागीच करुण अंत झाला. अपघातात मयूरीची आई गंभीर जखमी झाली असून त्यांना तातडीने चाकण येथील स्थानिक रुग्णालयात दाखल करण्यात आले आहे. सध्या त्यांच्यावर उपचार सुरू असून त्यांची प्रकृती चिंताजनक आहे.

भाऊ-बहिणीच्या नात्याचा आनंद साजरा करणाऱ्या रक्षाबंधनाच्याच दिवशी भोर कुटुंबावर काळाने घाला घातल्यामुळे अवसरी आणि वासुली परिसरात हळहळ व्यक्त केली जात आहे. घटनेची माहिती मिळताच पोलिसांनी घटनास्थळी धाव घेऊन पंचनामा केला असून अधिक तपास सुरू आहे.