मावळ : संत तुकाराम महाराजांच्या पावन देहू नगरीपासून त्यांच्या तपोभूमी भंडारा डोंगरापर्यंत भाविकांसाठी आता थेट बससेवा सुरु करण्यात आली आहे. पुणे महानगर परिवहन महामंडळाने (PMPML) सुरू केलेल्या या बससेवेचा शुभारंभ पंतप्रधान नरेंद्र मोदी यांच्या वाढदिवसाचे औचित्य साधून करण्यात आला असून या बससेवेमुळे भाविकांना येणे- जाणे सोयीचे होणार आहे. 

देहू ते भंडारा डोंगर अशी बससेवेचा शुभारंभ जिल्हा बँकेचे अध्यक्ष माऊली दाभाडे, रवींद्र भेगडे आणि भंडारा डोंगर संस्थांचे अध्यक्ष बाळासाहेब काशीद यांनी हिरवा झेंडा दाखवून करण्यात आला. राज्याच्या कानाकोपऱ्यातून देहू आळंदी आणि भंडारा डोंगरवर वर्षभर भाविक दर्शनासाठी येत असतात. मात्र डोंगरावर पायी जायला तीस ते चाळीस मिनिट लागतात. मात्र या बससेवेमुळे भाविकांना मोठा दिलासा मिळाला आहे. 

दिवसभरातून होणार सात फेऱ्या 
पुणे महापालिकेच्या परिवहन महामंडळाने सुरु केलेल्या या बससेवेमुळे भाविकांना मोठा दिलासा मिळाला असून दिवसभरात एकूण सात फेऱ्या धावणार आहेत. त्यामुळे भाविकांना सोयीस्कर प्रवास करून दोन्ही तीर्थक्षेत्रांना भेट देण्याची संधी मिळणार आहे. शिवाय येण्या जाण्यासाठीचा वेळ देखील वाचणार आहे. 

सेवेचा लाभ घेण्याचे आवाहन 
उपक्रमाबद्दल भंडारा डोंगर समितीचे अध्यक्ष हभप बाळासाहेब महाराज काशीद पाटील आणि मावळ भाजप नेते रविंद्र आप्पा भेगडे यांनी भाविकांना सेवेचा लाभ घेण्याचे आवाहन केले. “ही बससेवा केवळ वाहतुकीचे साधन नसून, श्रद्धा आणि अध्यात्म जोडणारा पूल आहे. संत तुकाराम महाराजांच्या विचारांचा वारसा भाविकांपर्यंत पोहोचविण्यास ती महत्त्वाची ठरेल,” असे प्रतिपादन बाळासाहेब महाराज काशीद पाटील यांनी केले.