अक्षय बडवे
पुणे : दिवाळीच्या कालावधीत दागिने खरेदी करणाऱ्यांची सराफ दुकानात गर्दी होती. याचा फायदा घेत एका महिला व पुरुषाने दुकानात हातचलाखी करत दागिने लंपास केले होते. या प्रकरणी दाखल तक्रारीवरून पोलिसांनी तपास केला असता चोरी करणाऱ्या महिला व पुरुषाला पुण्यातील लष्कर पोलिसांनी ताब्यात घेतले आहे. 

पुण्यातील (Pune News) कॅम्प परिसरातील एका सराफी दुकानात चोरी झाल्याची घटना घडली होती. याबाबतची तक्रार लष्कर पोलीस ठाण्यात देण्यात आली होती. यानंतर त्या ठिकाणी एक महिला आणि एका पुरुषावर गुन्हा दाखल करण्यात आला होता. या दुकानातून या जोडप्याने हातचलाखी करुन अंदाजे १५ हजार रुपये किमतीचे ३ जोडी सोन्याचे कानातले चोरून नेले होते. हा संपूर्ण प्रकार सीसीटीव्ही (CCTV) कॅमेरात कैद झाला होता. 

याच्या आधारे पोलिसांनी तांत्रिक विश्लेषणद्वारे यातील महिला आरोपी पुण्यात राहत असल्याचे मिळून आल्यानंतर लष्कर पोलिसांनी तिला ताब्यात घेतले. त्यानंतर तिच्या सोबत असलेल्या साथीदाराला ताब्यात घेऊन त्या दोघांना अटक केली. 

शेखर वाणी आणि शिवानी साळुंखे असे अटक केलेल्या आरोपींचे नावे आहेत. दरम्यान या बंटी आणि बबलीने यापूर्वी देखील पुणे शहरात २, मुंबई शहरात ३, ठाण्यात २, पिंपरी चिंचवडमध्ये २ तर सिंधुदुर्ग, सातारा शहरात १ अशा ठिकाणी चोरी केल्याचे तपासात समोर आले आहे.