Pune Beed Express train Ticket update : पुणे आणि बीड दरम्यान प्रवास करणाऱ्या प्रवाशांसाठी मध्य रेल्वेने अत्यंत आनंदाची बातमी दिली आहे. प्रवाशांची वाढती मागणी लक्षात घेऊन मध्य रेल्वेद्वारे पुणे - बीड - पुणे (11433 / 11434) ही दैनंदिन एक्सप्रेस गाडी नियमित सेवेसाठी सुरू करण्यात येत आहे. या गाडीमुळे दोन्ही शहरांमधील संपर्क वाढणार असून प्रवाशांचा वेळ आणि त्रास दोन्ही वाचणार आहे.

गाडीचे वेळापत्रक आणि तारीख:

पुणे ते बीड (गाडी क्र. 11433) ही गाडी २२ सप्टेंबर २०२६ पासून पुण्यावरून दररोज रात्री १०:४५ वाजता सुटेल आणि दुसऱ्या दिवशी सकाळी ०६:०० वाजता बीडला पोहोचेल.

बीड ते पुणे (गाडी क्र. 11434) ही गाडी २३ सप्टेंबर २०२६ पासून बीडवरून दररोज रात्री ०९:३० वाजता सुटेल आणि दुसऱ्या दिवशी सकाळी ०५:२० वाजता पुण्याला पोहोचेल.

कोण कोणत्या स्थानकावर थांबणार एक्स्प्रेस -

बीडहून पुण्याला एक्सप्रेस ट्रेनने फक्त ७ ते ८ तासात पोहचता येणार आहे. रात्री साडेनऊ वाजता सुटलेली ट्रेन पहाटे ५ वाजता पोहोचणार आहे. पुणे-बीड ही एक्सप्रेस गाडी उरुळी, दौंड कॉर्ड लाईन, श्रीगोंदा रोड, अहिल्यानगर, नारायणडोह, न्यू आष्टी आणि अमळनेर भांड्याचे या महत्त्वाच्या स्थानकांवर थांबणार आहे.

तिकीट बुकिंग कधीपासून होणार सुरूवात?

पुणे-बीड या ट्रेनचे तिकीट आरक्षण २० सप्टेंबर २०२६ पासून सर्व PRS केंद्रांवर तसेच IRCTC च्या संकेतस्थळावर (www.irctc.co.in) सुरू होणार आहे. याशिवाय अनारक्षित (General) डब्यांसाठी प्रवासी UTS प्रणालीद्वारे किंवा 'रेल वन' (RailOne) ॲपद्वारे तिकीट बुक करू शकतात.

तिकीट दर (Class wise Ticket Prices):

स्लीपर (SL): ₹१५० ते ₹२६५

३ एसी (3A / 3E): ₹५२० ते ₹७२०

२ एसी (2A): ₹७२५ ते ₹१,०२०

फर्स्ट एसी (1A): ₹१,१९० ते ₹१,७०५

बीड ते पुणे दरम्यान अखेर बहुप्रतिक्षित थेट रेल्वे सेवा सुरू होत आहे. या मार्गामुळे बीडमधील लाखो लोकांना मोठा दिलासा मिळाला आहे. आतापर्यंत खासगी बस आणि ट्रॅव्हल्सच्या महागड्या तिकीट दरांमुळे होणारी आर्थिक लूट यामुळे थांबणार आहे. फक्त १५० रुपयांत पुणे गाठणे शक्य होणार आहे. या नवीन दैनंदिन एक्सप्रेसचा सर्वाधिक फायदा नोकरदारवर्ग, पुण्या-मुंबईत शिक्षण घेणारे विद्यार्थी आणि आरोग्य उपचारांसाठी जाणाऱ्या रुग्णांना होणार आहे. या एक्सप्रेसमुळे बीड जिल्ह्याच्या दळणवळणाला आणि आर्थिक विकासाला आता खऱ्या अर्थाने गती मिळणार आहे.