मुलं ही देवाघरची फुलं असतात असं आपण म्हणतो, मात्र पुण्यातल्या हिंजवडीत 20 लहान मुलांना कोंडून ठेवल्याची धक्कादायक घटना घडलीय. अंगणवाडी सेविकेनं चक्क चिमुकल्यांना खोलीत कोंडून माजी सरपंचाच्या बैठकीला उपस्थिती लावली..असहायता आणि भितीनं मुलांची गाळण उडाली आणि बंद खोली या मुलांनी आक्रोश सुरू केला.

नेमकं काय घडलं ?

माजी सरपंचानं बैठक बोलावली होती. अंगणवाडी सेविका आणि मदतनीस यांना बैठकीला जायचे होते. मात्र 20 लहान मुलांची जबाबदारी कोण घेणार? म्हणून त्यांना बंद खोलीत कोंडले. खोलीला कुलूप लावून त्या थेट बैठकीला निघून गेल्या. चिमुकल्यांनी खिडकीतून आक्रोश केल्यानंतर हा प्रकार समोर आला.

अंगणवाडीत ५ वर्षांखालची मुलं असतात. या लहान मुलांना आई बाबांशिवाय एकटं राहायची सवय नसते. त्यांना मोठ्या विश्वासाने पालक अंगणवाडीत सोडतात. त्यामुळे त्यांना असं वाऱ्यावर सोडून जाणं कितपत योग्य आहे? याचा मुलांच्या कोवळ्या मनावर आघात होऊ शकतो. त्यामुळे या अंगणवाडीसेविकेसह मदतनीसावर कारवाई करण्याची मागणी होतेय.