>> तरबेज शेख

नाशिक : नाशिकमधील त्र्यंबकेश्वरजवळ एका खासगी बसला अपघात झाला आहे. बसमधील सर्व भाविक त्र्यंबकेश्वर येथून दर्शन करुन परतत असताना बसला अपघात झाला. या अपघातात 13 जण जखमी झाल्याची प्राथमिक माहिती आहे. तर दोघांची प्रकृती गंभीर असल्याची माहिती आहे. जखमींमध्ये लहान मुलांचा देखील समावेश आहे.

बस चालकाचं नियंत्रण सुटल्याने बसला अपघात झाला. बस रस्त्याच्याकडेला जाऊन उलटली. या बसमधील सर्व प्रवासी बुलढाणा जिल्ह्यातील चांडोळ गावचे रहिवासी असल्याची माहिती आहे. सध्या जखमींना उपचारासाठी नाशिक जिल्हा रुग्णालयात हलवण्यात आले आहे.

मिळालेल्या माहितीनुसार, त्र्यंबकेश्वरजवळ ही भाविकांची मिनी बस उलटली आहे. बसमधील 29 पैकी 13 प्रवासी जखमी झाले आहेत. ब्रह्मगिरी पर्वतावरून परतल्यानंतर माघारी परतत असताना गंगाद्वार जाणाऱ्या ठिकाणी उतारावर बसला अपघात झाला.

उतारावरून खाली येत असताना संस्कृती हॉटेल पर्यटन केंद्र येथे वाहनावरील नियंत्रण सुटले व बस थेट नाल्यात पलटी होऊन समोरच्या झाडाला अडकली. त्यामुळे पुढील अनर्थ टळला. जखमी भाविकांना उपचारासाठी रुग्णालयात दाखल करण्यात आले आहेत.