अकोला : हि माझी पत्नी असून अद्याप आम्हाला बाळ नको, असे एका अल्पवयीन मुलीला घेऊन आलेल्या २३ वर्षीय युवकाने जिल्हा स्त्री रूग्णालयातील डॉक्टरांना सांगितले होते. तेथील डॉक्टरांना मुलगी अल्पवयीन असल्याचा संशय आला आणि त्यांनी पोलिसांना या घटनेबाबत माहिती दिली आहे. त्यानंतर धक्कादायक माहिती समोर आली आहे.

चुलत बहीणीलाच आपल्या वासनेची शिकार करणाऱ्या २३ वर्षीय युवकाला पोलिसांनी बेड्या ठोकल्या असून त्याची रवानगी कारागृहात करण्यात आली आहे. अकोल्यातील बाळापूर पोलिसांच्या हद्दीतील गोरेगाव खुर्द या ठिकाणी बहीण- भावाच्या नात्याला काळिमा फासणारी घटना घडली आहे. बाळापूर तालुक्यातील गोरेगाव खुर्द या ठिकाणी एक महिला आपल्या अल्पवयीन मुलीसोबत राहत होती.

हे देखील पहा-

या महिलेने आपला पुतण्या संतोष उर्फ प्रमोद ज्योतीसींग चव्हाण या २३ वर्षीय युवकाला कोणीच नसल्याने आपल्या घरात आश्रय दिला होता. सदर महिलेचा पती दारुड्या असल्याने ती एकटीच मोलमजुरी करुन चरितार्थ चालवत होती. ती मजुरीला बाहेर जात असल्याची संधी साधून या युवकाने लग्नाचे आमिष दाखवून आपल्याच चुलत बहिणीवर अत्याचार केला आहे. यातूनच ती गर्भवती राहिली.

यामुळे घाबरुन संतोषने त्या पीडितेला अकोला या ठिकाणी स्त्री रुग्णालयात गर्भपात करण्याच्या उद्देशाने घेऊन गेला. कोणाला संशय येऊ नये, म्हणून त्याने पती- पत्नी असल्याचा बनाव केला. मात्र, डॉक्टरांना संशय आल्याने याची माहिती पोलिसांना देण्यात आली आहे. बाळापूर पोलिस ठाण्याअंतर्गत येणाऱ्या वाडेगाव पोलिस चौकीचे पोलिस उपनिरीक्षक गजानन रहाटे यांनी तपास करून आरोपीला अटक करून न्यायालयात हजर केले असता न्यायालयाने त्याची रवानगी कारागृहात केली आहे.

Edited By- Digambar Jadhav