आगामी स्थानिक स्वराज्य संस्थांच्या निवडणुकांना अवघे काही महिने शिल्लक आहेत. नेत्यांनी मोर्चेबांधणीला सुरूवात केली आहे. राज्यात राजकीय वारे वेगाने वाहू लागले आहेत. अशातच भंडाऱ्यात मोठी राजकीय घडामोड घडली आहे. भंडाऱ्याच्या तुमसर पंचायत समितीचे भाजपचे माजी सभापती नंदू रहांगडाले यांनी भाजपची साथ सोडली आहे. त्यांनी राष्ट्रवादी काँग्रेस अजित पवार गटात जाहीर प्रवेश केला आहे.

गेल्या काही दिवसांपासून नंदू रहांगडाले हे भाजपची साथ सोडणार असल्याची चर्चा रंगली होती. अखेर त्यांनी आज त्यांच्या समर्थकांसह आज अजित पवारांच्या राष्ट्रवादी काँग्रेसमध्ये प्रवेश केला. त्यांचा पक्षप्रवेश भाजपसाठी मोठा धक्का मानला जात आहे. नंदू रहांगडाले हे सध्या भाजपचे पंचायत समितीचे गट नेते आहेत.

राष्ट्रवादी काँग्रेसचे आमदार राजू कारेमोरे यांच्या नेतृत्वात नंदु रहांगडाले यांनी पक्षप्रवेश केला. यावेळी नंदु रहांगडाले यांच्या समर्थकांनीही भाजपची साथ सोडली. त्यांनी नंदु रहांगडालेंसोबत अजित पवारांची साथ दिली. हा पक्षप्रवेश सोहळा मुंबईत पार पडला असून, राष्ट्रवादीचे नेते प्रफुल पटेल यांच्या प्रमुख उपस्थितीत हा पक्ष प्रवेश पार पडला.

तुमसर नगरपालिकेची आगामी काळात निवडणूक होत आहे. या दृष्टीने हा पक्षप्रवेश राष्ट्रवादी काँग्रेससाठी महत्त्वाचा मानला जातोय. विशेष म्हणजे, नंदू रहांगडाले हे भाजपच्या तिकिटावर पंचायत समिती सदस्य म्हणून निवडून आले होते. मात्र, ते शरद पवार गटाचे माजी आमदार चरण वाघमारे यांचे कट्टर समर्थक म्हणूनही ओळखले जातात.