पिंपरी चिंचवड : पिंपरी चिंचवड महापालिकेने अतिक्रमक केलेले बांधकाम पाडण्याची मोहीम हाती घेतली आहे. त्यानुसार सांगवी भागात गेलेल्या पथकाला तुम्ही आमचे बांधकाम पाडले तर माझ्या बाळाला खाली फेकून देईल व मी आत्महत्या करेल अशा शब्दात धमकावत कर्मचाऱ्यांना शिवीगाळ देण्यात आल्याचा प्रकार घडला आहे. या प्रकरणी पोलिसात दोन जणांवर गुन्हा दाखल करण्यात आला आहे. 

पिंपरी चिंचवड महानगरपालिकेचे अनधिकृत बांधकाम पाडण्याची मोहीम हाती घेण्यात आली आहे. त्यानुसार महापालिकेचे अतिक्रमण अधिकारी व कर्मचारी सांगवी भागात कारवाई करण्यासाठी आज गेले होते. यावेळी अतिक्रमण पडण्यास विरोध करण्यात आला. राजाराम लाड आणि निलेश लाड यांनी सांगवी भागात अनधिकृत बांधकाम केलेले बांधकाम पाडण्यासाठी गेलेल्या पथकाला आमचे बांधकाम पाडले; तर मी माझ्या बाळाला खाली फेकून देईल व मी सुद्धा आत्महत्या करेल अशी धमकी दिली. 

कर्मचाऱ्यांना केली शिवीगाळ 

अतिक्रमण काढण्यासाठी महापालिकेच्या पथकासोबत पोलिसांचा फौजफाटा देखील उपलब्ध करण्यात आला होता. यावेळी घरासमोर आलेल्या पथकातील कर्मचाऱ्यांना आपल्या तीन वर्ष वयाच्या लहान मुलाला जाळी मधून खाली टाकण्याची धमकी दिली. तर बांधकाम पाडण्यासाठी अडथळा निर्माण करत पथकाला शिवीगाळ देखील करण्यात आली. यामुळे येथे बराच वेळ गोंधळ निर्माण झाला होता. 

दोघांविरोधात गुन्हा दाखल 
अतिक्रमण पडण्यास विरोध केल्याने राजाराम लाड आणि निलेश लाड यांच्या वर सांगवी पोलीस ठाण्यात बीएनएस कलम अंतर्गत सरकारी कामात अडथळा निर्माण केल्याप्रकरणी राजाराम लाड, निलेश लाड या दोघांवर गुन्हा दाखल करण्यात आला आहे. गुन्हा दाखल होताच राजाराम आणि निलेश लाड हे फरार झाले आहेत. तर सांगवी पोलिसांकडून या दोघांचाही शोध सुरू करण्यात आला आहे.