पिंपरी चिंचवड : पिंपरी चिंचवड शहरातील वाकड पोलीस स्टेशन हद्दीमध्ये मध्यरात्रीच्या सुमारास दरोडा (Pimpri Chinchwad) टाकण्याच्या प्रयत्न असफल झाला आहे. कोयत्यासारखे धारदार शस्त्र आणि मिरची पूडच्या मदतीने दरोडा घालण्याच्या तयारीत असलेल्या दरोडेखोरांना वाकड पोलिसांनी (Police) बेड्या ठोकल्या आहेत. (Latest Marathi News)

पिंपरी चिंचवड शहरातील थेरगाव परिसरातील साहील एलिगंस सोसायटी समोर काही संशियत व्यक्ती मध्यरात्री तीन वाजता दरम्यान धारदार शस्त्रासोबत दबा धरून बसल्याची खात्रीशीर माहिती वाकड पोलिसांना मिळाली होती. माहिती मिळताच वाकड पोलिसांनी माहिती मिळालेल्या स्थळी पोहचून चार दरोडे खोरांना बेड्या ठोकल्या आहेत. तर एक दरोडे खोर पोलिसांच्या हातावर तुरी देऊन पसार होण्यात यशस्वी झाला आहे. बेड्या ठोकण्यात आलेल्या दरोडेखोरांकडून तीन लोखंडी कोयते, मिरची पुड, एक मोबाईल फोन, एक तीन चाकी टेम्पो आणि मोपेड दुचाकी पोलिसांनी जप्त केली आहे. 

अटक केलेल्यांवर यापूर्वीही गुन्हे 

पोलिसांनी श्याम हरी गाडवे, अतिश भारत शिरसाट, नवनाथ दिगंबर साठे आणि शुभम सिद्राम कांबळे अशी बेड्या ठोकलेल्या दरोडेखोरांची नावे आहेत. तर करण उर्फ कला टाक हा दरोडेखोर फरार आहे. बेड्या ठोकण्यात आलेले दरोडेखोर हे रेकॉर्डवरील अट्टल गुन्हेगार असून त्यांच्यावर वाकड, पिंपरी, चिंचवड, सांगवी आणि तळेगाव दाभाडे पोलीस स्टेशनमध्ये गंभीर स्वरूपाचे गुन्हे दाखल आहेत