राज्यातील नेतेमंडळी राजकारण सोडून वेगळ्याच अंदाजात दिसली तर चर्चा होणारच. अशीच चर्चा रंगली ती राज्याच्या पर्यावरण मंत्री आणि जालन्याच्या पालकमंत्री पंकजा मुंडे यांची. त्याचं झालं असं की, मुंबईतील एका फॅशन शोमध्ये 'वॉक फॉर अ कॉज' या कार्यक्रमात पंकजा मुंडे सहभागी झाल्या. आणि सहभागी होत त्यांनी एखाद्या मॉडेलला साजेसा रॅम्प वॉकही केला.आता याच रॅम्प वॉकमुळे विरोधकांनी पंकजा मुंडेवर टीकेची झोड उठवलीय.

तर दुसरीकडे, जालन्यातील महिला शेतकऱ्याच्या कामाला ओळख मिळवून देण्यासाठीच आपण रॅम्प वॉक केल्याचं प्रत्युत्तर पंकजा मुंडेंनीही उत्तर दिलंय. पंकजा मुंडेंनी आपली भूमिका रोखठोकपणे मांडली असली तरी राज्यात दुष्काळाचं संकट गडद झालेलं असताना जबाबदार मंत्र्यांकडूनच अशा पद्धतीनं एखाद्या ब्रँडसाठी पुढाकार घेणं कितपत योग्य आहे अशी चर्चा आता रंगलीय. त्यामुळे ब्रँडच्या प्रमोशनसाठी मुंडेंनी अन्य पर्यांयाचा विचार करायला हवा होता की लोकल ब्रॅंडला प्रमोट करण्यासाठीचा त्यांचा रॅम्प वॉक योग्य होता? हा खरा प्रश्न आहे.