• पंकजा मुंडे यांच्या वाढदिवसानिमित्त बॅनर्सबाजी

• जनतेच्या मनातील मुख्यमंत्री या आशयाचे बॅनर झळकले

• बीडमधील राजकीय वर्तुळात चर्चांना उधाण

• पंकजा मुंडे समर्थकांची पोस्टरबाजी

योगेश काशिद, बीड

'पंकडा मुंडे जनतेच्या मनातील मुख्यमंत्री' अशा आशयाचे बॅनर बीडमध्ये झळकल्याचे पाहायला मिळत आहे. पंकजा मुंडे यांच्या वाढदिवसाच्या निमित्ताने त्यांना शुभेच्छा वर्षाव करत समर्थकांनी ठिकठिकाणी बॅनर्स लावले आहेत. यातच जतेच्या मनातील मुख्यमंत्री या आशयातील बॅनर्सने सर्वांचे लक्ष वेधले असून यामुळे राजकीय वर्तुळात चर्चांना उधाण आले आहे. याबाबत आता उलटसुलट चर्चा होऊ लागल्या आहेत.

राज्याच्या पर्यावरण व पशुसंवर्धन मंत्री पंकजा मुंडे यांच्या वाढदिवसानिमित्त राज्यभरात कार्यकर्त्यांकडून विविध ठिकाणी शुभेच्छांचे बॅनर झळकले आहेत. मात्र बीड शहरात लावण्यात आलेल्या एका बॅनरने सर्वांचे लक्ष वेधून घेतले आहे. या बॅनरवर 'पंकजा मुंडे... जनतेच्या मनातील मुख्यमंत्री' असा ठळक उल्लेख करण्यात आल्याने राजकीय वर्तुळात जोरदार चर्चा होऊ लागल्या आहेत.

बीड येथील शासकीय विश्रामगृहासमोर लावण्यात आलेल्या या आकर्षक बॅनरवर दिवंगत नेते गोपीनाथ मुंडे यांचा फोटो, मंत्री पंकजा मुंडे यांचे मोठे छायाचित्र तसेच शुभेच्छा देणाऱ्या कार्यकर्त्यांचे फोटो झळकत आहेत. विकास ढोरमारे आणि साहस आदोडे यांनी हा शुभेच्छा फलक उभारला आहे. या बॅनरमुळे बीडमध्ये चांगलीच चर्चा होत आहे.

वाढदिवसाच्या शुभेच्छांसोबतच "जनतेच्या मनातील मुख्यमंत्री" असा उल्लेख केल्याने या बॅनरची राजकीय अर्थाने चर्चा सुरू झाली आहे. आगामी स्थानिक स्वराज्य संस्था निवडणुकांच्या पार्श्वभूमीवर या बॅनरकडे राजकीय निरीक्षक आणि कार्यकर्त्यांचे विशेष लक्ष लागले असून, बीडच्या राजकीय वर्तुळात याची जोरदार चर्चा रंगताना दिसत आहे.