भरत नागणे, साम टीव्ही

पंढरपूर शहरात एका विवाहित महिलेला सोशल मीडियावरून अश्लील मेसेज आणि नग्न फोटो पाठवून विनयभंग केल्याची धक्कादायक घटना समोर आली आहे. या प्रकरणी सोलापूर येथील एका तरूणाविरोधात पंढरपूर शहर पोलीस ठाण्यात गुन्हा दाखल करण्यात आला असून पोलिसांनी आरोपीला ताब्यात घेतले आहे.

अजर मस्जिद शेख (वय 28, रा. न्यू जिंदगी चौक, सोलापूर) असे आरोपीचे नाव आहे. पोलिसांनी दिलेल्या माहितीनुसार, आरोपीने 4 मार्च ते 29 मार्च दरम्यान पंढरपूरमधील एका विवाहित महिलेच्या फेसबुक अकाऊंट वारंवार अश्लील मेसेजेस पाठवले. तसेच नग्न स्वरूपातील फोटो पाठवून तिला त्रास दिला.

इतकेच नव्हे तर, तुम्ही फोटो ओपन केला का? आणखी व्हिडिओ आणि फोटो पाठवू का? असे मेसेज पाठवत आरोपीने महिलेला मानसिक त्रास देण्याचा प्रयत्न केला. अखेर या प्रकाराला कंटाळून संबंधित महिलेनं पंढरपूर शहर पोलिस ठाण्यात तक्रार दाखल केली. तक्रारीनंतर पोलिसांनी तात्काळ गुन्हा नोंदवत आरोपीला ताब्यात घेतले असून सदर घटनेचा पोलीस तपास करत आहेत. याबाबत अधिक माहिती देताना पोलीस निरीक्षक दशरथ वाघमोडे यांनी सांगितले की, सायबर माध्यमातून होणाऱ्या अशा प्रकारच्या गुन्ह्याविरोधात कडक कारवाई करण्यात येणार आहे.

दरम्यान अधिक मासातील पद्मीनी एकादशीचा सोहळा आज पंढरपुरात साजरा होत आहे. तसेच आज बकरी ईद देखील असल्याने पंढरपुरमधील मुस्लिम धर्मीय नागरिकांनी बकरी ईदची कुर्बानी न देण्याचा एक मोठा आणि ऐतिहासिक निर्णय घेतलाय. पंढरपुरात वारकरी सांप्रदायाला मांस वर्ज आहे. त्यामुळेच विठ्ठल भक्त असणाऱ्या मुस्लिम धर्मीय बांधवांनी आजची बकरी ईद उद्या साजरा करण्याचा निर्णय घेतला आहे. तसेच नमाज पठाणासह सर्व धार्मिक कार्यक्रम उद्याच करण्याचा निर्णय घेण्यात आला आहे.