फैय्याज शेख 

वाडा : उन्हाची तीव्रता वाढत असताना पाण्याची समस्या देखील गडद होत चालली आहे. यामुळे दूरवरून पाणी आणण्यासाठी भटकंती करावी लागत आहे. हीच परिस्थिती वाडा तालुक्यात निर्माण झाली असून काळ्याकुट्ट अंधारात पाण्यासाठी बोरिंगवर रात्र रात्रभर जागून महिलांना पाणी आणावे लागत आहे. भीषण पाणी टंचाईचे चटके जाणवत असल्याने परिसरात हे भीषण चित्र पाहण्यास मिळत आहे. 

पालघर जिल्ह्यातील वाडा तालुक्यातील पन्नास घरांची लोकवस्ती असलेल्या नदीचापाडा या गावात भीषण पाणीटंचाईला महिलांना सामोरे जावे लागत आहे. दिवसभर कामाला जावे लागत असल्याने दूरवरून पाणी आणणे शक्य नाही. यामुळे रात्री १ वाजता सुध्दा महिला बॅटरीच्या उजेडात बोरिंगवरून पाण्याचे हांडे, प्लास्टिकचे ड्रम घेऊन रात्र बोरवेल किंवा विहीरीवर काढावी लागत आहे. हे चित्र रोजच पाहण्यास मिळत आहे.  

रात्रीही पाण्यासाठी धडपड 

पंधरा मिनिटे बोरिंग हापसल्या नंतर एक हंडा पाणी मिळते, तर कधी मिळत पण नाही. बोरिंगला पाणी गढूळ येते. तेच पाणी पिण्यासाठी वापरले जात असते. त्यामुळे गावातील लहान मुले आजारी पडत असल्याचे येथील महिला सांगतात. रात्र ते दिवसभरपर्यंत महिलांना  पाण्यासाठी धडपड करावी लागते. कधी तर बाहेर गावातून पिण्याचे पाणी वीस रुपये देऊन विकत आणावे लागत असल्याची वेळ येथील नागरिकांवर येत आहे. 

निवडणुकीपुरते आश्वासन 

पाण्यावरून महिलांचे भांडण पण होतात. पाणी पुरवठा करणाऱ्या बाबत ग्रामस्थांनी अनेक तक्रारी दिल्या आहेत. मात्र प्रशासनाने या तक्रारीकडे दुर्लक्ष केल्याने पाणी टंचाई निर्माण झाली आहे. निवडणूक आली की आश्वासन देतात नंतर कोणी येत नाही. यामुळे येथील पाण्याची भीषणता राजकारण्यांना कोठून समजणार अशी संतप्त प्रतिक्रिया येथील महिलांकडून व्यक्त केली जात आहे.