Jarange protest latest update from Maharashtra : मनोज जरांगे यांनी मराठा आरक्षणासाठी चलो मुंबईची हाक दिली आहे. २९ ऑगस्टपासून मुंबईमध्ये आंदोलनाला सुरूवात होणार आहे, त्याआधी २७ ऑगस्टपासून जरांगे जुन्नरमार्गे मुंबईकडे रवाना होणार आहेत. मनोज जरांगे पाटील यांना मुंबईमध्ये पाय ठेवू देणार नाही, अशी भूमिका लक्ष्मण हाके यांनी घेतली आहे. त्यामुळे पुन्हा एकदा जरांगे आणि हाके आमनेसामने येणार आहेत. मनोज जरांगे पाटील यांच्या गणपतीचे मुंबईच्या अलीकडेच विसर्जन करणार असल्याचे हाके यांनी सांगितले. आज ते पत्रकार परिषदेत बोलत होते. दरम्यान, मनोज जरांगे अशा पद्धतीची मागणी करत असतील तर आमचा जीव गेला तरी चालेल, पण ओबीसीमधून आरक्षण घेऊ देणार नाही, असेही हाके म्हणाले.

नेमकं लक्ष्मण हाके काय म्हणाले?

दादागिरीच्या जोरावर दहशत निर्माण करून आरक्षण मिळत नाही. दहशत निर्माण करणारी जात मागास असू शकत नाही. जरांगेंनी कितीही दहशत निर्माण केली तरी संविधानाने त्यांना आरक्षण भेटू शकत नाही. बोगस कुणबी सर्टिफिकेटद्वारे यांनी ओबीसीतून आरक्षण मिळू शकत नाही. तसे झाले तर देशभरातील ओबीसी संपलेला असेल, असेही हाके म्हणाले.

मुख्यमंत्री देवेंद्र फडणवीस यांची आय माय काढणारे जरांगे पाटील आणि सत्तेत मांडीला मांडी लावून बसणारे अजित पवार आणि एकनाथ शिंदे, या सगळ्यांनी अनेक जिल्ह्यांमध्ये चौका चौकात भले मोठे बॅनर उभे केले आहेत. देवेंद्र फडणवीस यांच्या मांडीला मांडी लावून बसायचे.... जरांगे पाटील यांना रसद पूरवायची अन् पाठिंबा द्यायचा सुरू आहे. शरद पवार राष्ट्रवादी गट आणि अजित पवार राष्ट्रवादी गटाची जरांगे पाटलांना सपोर्ट आहे. दोघांमध्ये मदत कशी करायची, त्यासाठी चढाओढ लागली आहे. उघड पाठिंबा देत आहेत. शरद पवार आणि अजित पवार हे वेगवेगळे नाहीत. मुख्यमंत्रींनी किती सांगत असले तरी शरद पवार हे सत्तेत एक प्रकारे सामील असल्याचा आरोप आहे. काहीही करा पण ओबीसींच आरक्षण संपवू नका, असे हाके म्हणाले.