ज्या वॉर्डात कमी मतं, त्यांची काही खैर नाही, हे वक्तव्य आहे राज्याचे वैद्यकीय शिक्षणमंत्री हसन मुश्रीफ यांचं. हसन मुश्रीफांनी नगरपरिषद निवडणुकीच्या प्रचारसभेत बोलताना मतदारांना थेट धमकीच दिलीय. मात्र या धमक्यांचा सिलसिला सुरु झाला तो लातूरमध्ये अजित पवारांनी केलेल्या वक्तव्यातून. तुम्ही काट मारली तर मी निधीवर काट मारणार, असं म्हणत अजित पवारांनी मतदारांना इशारा दिला.फक्त अजित पवारच नाही तर शरद पवारांच्या राष्ट्रवादीचे नेते समरजितसिंह घाटगेंनीही माघार न घेणाऱ्या उमेदवारांना लक्षात ठेवणार, असं वक्तव्य केलंय.

या धमक्यांच्या मालिकेत भाजपही मागे राहिलं नाही. भाजपचे ज्येष्ठ नेते आणि माजी मंत्री सुधीर मुनगंटीवारांनी तर जिथं काँग्रेस उमेदवार निवडून येईल, तिथं जनतेची कामंच करणार नाही, अशी धमकी दिलीय. तर भाजप उमेदवाराने निवडणूक खर्चाची चिंता करु नये, असा सल्लाच मंत्री चंद्रशेखर बावनकुळेंनी केलाय. तर राजकीय नेते मतदार आपल्या घरी पाणी भरणारे सालकरी असल्याप्रमाणे धमक्या देत आहेत. त्यावरुन काँग्रेसने जोरदार हल्लाबोल केलाय.तर मुख्यमंत्री देवेंद्र फडणवीसांनी सारवासारव केलीय.