Mumbai Dam Levels :

जून ते सप्‍टेंबर २०२३ दरम्‍यान झालेल्‍या कमी पर्जन्यमानामुळे मुंबईला पाणीपुरवठा करणाऱ्या धरणांतील पाणीसाठा गत वर्षीच्या तुलनेने कमी झाला आहे. पाणीसाठा कमी झाल्याने मुंबईकरांना पाणीकपात होईल अशी भीती होती. मात्र पाणीसाठा कमी असला तरी मुंबईकरांच्या पाणीपुरवठ्यात कोणताही परिणाम होणार नाहीये. राज्‍य शासनानेदेखील मुंबईसाठी ‘निभावणी साठ्या’तून पाणी उपलब्‍ध करून दिले आहे.

सद्यस्थितीत मुंबईकरांच्‍या पाणीपुरवठ्यात कपात करण्याचा कुठलाही मानस नाही. येत्‍या पावसाळ्यापर्यंत पुरेसा पाणीपुरवठा होईल. अशारितीने नियोजन केलेले आहे, असे बृहन्मुंबई महानगरपालिका प्रशासनामार्फत स्पष्ट करण्यात येत आहे.

बृहन्‍मुंबई महानगरपालिका मुख्‍यालयात आज (दिनांक २६ मार्च २०२४) झालेल्या उच्‍चस्‍तरीय बैठकीत पाणीपुरवठ्याचा आढावा घेण्‍यात आला. धरणातील उपलब्‍ध पाणीसाठ्यावर महानगरपालिका प्रशासन बारकाईने लक्ष ठेऊन आहे.

राज्‍य शासनानेदेखील निभावणी साठ्यातून महानगरपालिकेस पाणीपुरवठा करण्याचे यापूर्वीच मान्‍य केले आहे. सद्यस्थितीत पाणीकपात करण्‍याचा बृहन्मुंबई महानगरपालिकेचा कोणताही प्रस्‍ताव नाही.

मुंबईकरांना विनंती करण्यात येते की, पाण्याचा जपून आणि काटकसरीने वापर करावा आणि बृहन्मुंबई महानगरपालिका प्रशासनास सहकार्य करावे, असे आवाहन करण्यात येत आहे.

किती पाणीसाठा शिल्लक?

मुंबईला उर्ध्व वैतरणा, तानसा, मोडक सागर, मध्य वैतरणा, भातसा, विहार, तुळशी या धरणातून पाणीपुरवठा केला जातो. सध्या या धरणात केवळ ३२.३२ टक्के पाणीसाठा शिल्लक आहे. मुंबईला रोज ३,८०० दशलक्ष लिटर पाणीपाणीपुरवठा केला जातो.