Pune News: पुण्यातील फुरसुंगी भागात व्हाट्सअप ग्रुपमधून काढल्याच्या वादातून एकाला बेदम मारहाण करत जीभ कापल्याची धक्कदायक घटना घडली. या घटनेने परिसरात एकच खळबळ पसरली. अशात आता या बाबात एक मोठा खुलासा झाला आहे. कोणत्याही व्यक्तीची जीभ कापली नव्हती अशी माहिती समोर आली आहे. (Latest Pune News)

सोसायटीतील सदस्यांनी काढलेल्या व्हॉट्सअॅप ग्रुपमधून रिमूव्ह केल्यावरून बाचाबाची झाल्यानंतर पाच जणांनी ग्रुप अ‍ॅडमिनला बेदम मारहाण केली. मारहाणीत या टोळक्याने अ‍ॅडमिनची जीभच कापली. त्यांच्या जीभेला टाके पडले असून, यात ते गंभीर जखमी झाले आहेत. याप्रकरणी पाच जणांवर गुन्हा दाखल केला आहे, अशी माहिती पसरवली जात होती.

मात्र आता समोर आलेल्या माहितीनुसार, तोंडात फटका लागल्याने जिभेत रक्त आल्याचे पोलिसांनी म्हटले आहे. संबंधित आरोपींवर ३२४ चा गुन्हा दाखल केला आहे. "ओम हाईट्स ऑपरेशन" या नावाने व्हॉट्सअप ग्रुप तयार केला होता. त्यात सर्व सदस्य होते. तक्रारदारांचे पती या ग्रुपचे अ‍ॅडमिन होते. दरम्यान, प्रकरणातील आरोपीला त्या ग्रुपमधून रिमूव्ह म्हणजे काढून टाकले.

ग्रुपमध्ये कोणीही कसलेही मेसेज करत असल्याने ग्रुपच बंद केला असल्याचे अॅडमिनने सांगितले. अशात आरोपीला याचा राग आल्याने त्याने इतर पाच जणांसोबत येऊन तक्रारदारांना मारहाण केली. त्यांच्या तोंडावर बुक्की मारली, या बुक्कीचा फटका इतका जोरात होता की, दातासह जिभेवर त्याचा मार लागला. त्यामुळे रक्त येत होते. कोणीही त्यांची जीभ कापली नव्हती अशी माहिती, पोलिस निरिक्षक अरविंद गोकुळे यांंनी दिली. पोलिसांनी या प्रकरणी ३२४ चा गुन्हा दाखल केला आहे.