अहमदनगर : नगर जिल्ह्यातील शेवगाव आणि नगर तालुक्यात पावसामुळे हाहाःकार उडाला आहे. एका व्यक्तीसह अनेक जनावरे वाहून गेली. तालुक्यातील नांदणी, चांदणी, ढोरा, भागिरथी या नद्यांनी धोक्याची पातळी ओलांडली आहे. अनेक गावांना पुराच्या पाण्याचा वेढा पडला आहे.

आखेगाव, खरडगाव, वरुर, भगूर, वडूले पुराच्या पाण्याने बाधित झाली आहेत. मंदिरातील पुजारी पाण्यात वाहून गेल्याचे सूत्रांनी सांगितले. काही भागात पुराच्या पाण्यात लोकं अडकून पडल्याने राष्ट्रीय आपत्ती निवारण दलाचे पथक जिल्ह्यात दाखल झाले आहे. बोटीतून त्यांनी लोकांना वाचविण्यासाठी प्रयत्न सुरू केले आहेत. एनडीआरएफचे तब्बल ३० जवान लोकांच्या मदतीला धावून आले आहेत.NDRF team arrives in Shevgaon to help people

सोमवारी रात्रभर झालेल्या पावसाने तालुक्यातील नंदिनी, चांदणी, वटफळी नदीला पूर आला आहे. या पुराच्या पाण्यात शंभरजण अडकल्याचे समजते. पुरामुळे गावकऱ्यांनी घरावर आश्रय घेतला. वडुले येथील मुरलीधर अनंदा सागडे हे साईबाबा मंदिरात दर्शनासाठी गेले होते. मात्र, पुराच्या पाण्यात ते वाहून गेले.

आखेगाव येथील पुल पाण्याखाली गेल्याने तालुक्यातील नगर,पांढरीपुल, नेवासा, गेवराई हे सर्व प्रमुख मार्ग बंद झाले. त्यामुळे वाहतुकीचा खोळंबा होऊन दोन्ही बाजूने वाहनांच्या रांगा लागल्या होत्या. आमदार मोनिका राजळे, माजी आमदार चंद्रशेखर घुले, सभापती डॉ. क्षितीज घुले, भाजपचे जिल्हाध्यक्ष अरुण मुंढे, माजी सभापती अरुण लांडे, भाकपचे सुभाष लांडे आदी नेते मंडळी मदतीसाठी उतरली आहे.NDRF team arrives in Shevgaon to help people