Nashik News : राष्ट्रवादीच्या नाशिकमधील देवळाली येथील आमदार सरोज अहिरे नॉट रिजेबल होत्या. त्यामुळे त्या नेमक्या शरद पवार की अजित पवार कुणाच्या बाजूने आहेत, हे स्पष्ट नव्हतं. मात्र त्यांना आज माध्यमांसमोर येत आपली भूमिका मांडली. पवारसाहेब आणि अजितदादा यांच्यापैकी एकाला निवडणे आमच्यासाठी जीवन मरणासारखा प्रश्न आहे, असं सरोज अहिरे यांनी म्हटलं.

मी अजित पवार यांना भेटले त्यानंतर काल शरद पवारांना देखील भेटून आले. सुप्रिया ताईंशीही माझं बोलणं झालं आहे. तब्येत ठीक नसल्याने सध्या अॅडमिट झाले आहे. मात्र लवकरच माझ्या मतदारसंघातील नागरिक आणि नेत्यांशी बोलून योग्य तो निर्णय घेणार असल्याचं सरोज अहिरे यांनी यांनी सांगितलं आहे.

मी गिरीश महाजन यांच्यामुळे निवडून आलेली नाही, तसं असेल तर दाखवा, मी राजीनामा देईन. दोन मेळावे, दोन गट यामुळे मानसिक त्रास होत आहे. त्यामुळेच मला अॅडमिट व्हावं लागलं आहे. अजित पवारांच्या समर्थनार्थ सर्व आमदार सही करत होते, मी देखील सही केली. मात्र त्यानंतर मी लगेच सुप्रिया ताईंशी बोलले, असंही सरोज अहिरे यांनी सांगितलं.  (Latest Marathi News)

मी निगरगट्ट राजकारणी नाही, मी भावनिक आहे. माझ्यासाठी दोघांमधून एकाला निवडणे कठीण आहे. हा माझ्यासाठी जीवन मरणाचा प्रश्न आहे. मी सही केल्यामुळे अजितदादा माझा पाठिंबा आहे, हे गृहीत धरू शकतात. पण मी माझी भूमिका अधिवेशनापूर्वी मांडेन, असं सरोज अहिरे यांनी म्हटलं.

शरद पवार माझे गुरू, माझ्या वडिलांसारखे आहेत. दादा मोठे नेते आम्ही त्यांचे कार्यकर्ते आहोत. मी आता कुठे मतदारसंघात पाय रोवत आहे. त्यामुळे मतदासंघांतील लोकांशी बोलून निर्णय घ्यावा लागेल, असंही त्यांनी म्हटलं.