अहमदनगर : २०१४ चे खरे मुख्यमंत्री कोण होते, तर ते गोपीनाथ मुंडे होते. दुर्दैवाने ते आपल्यात नाहीत. जर आज असते तर राजकारणाची पातळी इतक्या खालच्या पातळीवर गेली नसती, असे वक्तव्य राष्ट्रवादी काँग्रेसचे आमदार रोहित पवार (Rohit Pawar) यांनी अहमदनगर येथे केलं आहे. आज दिवंगत गोपीनाथ मुंडे (Gopinath Munde) यांची पुण्यतिथी आहे. त्यांच्या पुण्यतिथीनिमित्त आयोजित करण्यात आलेल्या कार्यक्रमात रोहत पवार बोलत होते. ( Rohit Pawar Latest News In Marathi )

हे देखील पाहा -

आज दिवंगत गोपीनाथ मुंडे यांची ८ वी पुण्यतिथी आहे. अहमदनगर जिल्ह्यातील जामखेड येथे गोपीनाथ मुंडे यांच्या पुण्यतिथीनिमित्त कार्यक्रमाचे आयोजन केले होते. या कार्यक्रमात आमदार रोहित पवारांनी गोपीनाथ मुंडे यांच्यावर भाष्य केलं. रोहित पवार म्हणाले, '२०१४ चे खरे मुख्यमंत्री कोण होते, तर गोपीनाथ मुंडे साहेब होते. दुर्दैवाने ते आपल्यात नाहीत. ते जर आज असते तर राजकारणाची पातळी इतक्या खालच्या पातळीवर गेली नसती. ते हयात असते तर राजकारणाची पातळी वर असती. विरोध झाला असता तर सर्वच राजकीय पक्षांमध्ये वाद झाला असता. पातळी आणि संस्कृती सोडून कोणी बोललं नसतं'.

दरम्यान, आमदार रोहित पवार यांनी गोपीनाथ मुंडेंवर केलेल्या वक्तव्यावर भाजप नेते प्रवीण दरेकर यांनी टीका केली आहे. 'हयात नसलेल्या व्यक्तीबद्दल बोलून वाद सुरू करणं महत्त्वाचं नाही. पवार कुटुंबीयातील कोण मुख्यमंत्री पदाचा उमेदवार आहे हे पहिलं रोहित पवार यांनी जाहीर करावं. मुख्यमंत्री पदाच्या उमेदवारीसाठी अजित पवार की सुप्रिया सुळे उमेदवार आहेत. रोहित पवार यांच्या मनात कुठल्या कोपऱ्यात मुख्यमंत्री पदाची ओढ आहे. घरातला एक उमेदवार निश्चित करा आणि मग आमच्या हयात नसलेल्या मुंडेसाहेबांविषयी बोला, असं प्रवीण दरेकर म्हणाले. 'हयात नसलेल्या व्यक्तींचा वापर करून वाद निर्माण करायला रोहित पवार अजून लहान आहेत, असा टोलाही दरेकरांनी रोहित पवारांना लगावला.

Edited By - Vishal Gangurde