Rohit Pawar News : शिंदे गटाच्या बंडाळीनंतर शिवसेनेत उभी फूट पडली आहे. शिवसेनेच्या ४० आमदारांनी बंडखोरी केल्याने शिवसेनेपुढे मोठं पक्षसंकट उभ ठाकलं आहे. बंडखोरीमुळे पक्षावर आलेल्या संकटावर मात करण्यासाठी शिवसेना नेते, आमदार आदित्य ठाकरे यांच्याकडून राज्यभर दौरा करण्यात येत असून ते शिवसैनिकांसोबत संवाद साधत आहेत. आदित्य ठाकरे यांच्या राज्यातील दौऱ्यावरून राष्ट्रवादी काँग्रेसचे आमदार रोहित पवार (Rohit Pawar) यांनी प्रतिक्रिया दिली आहे.

आमदार रोहित पवार हे अकोल्यातील मूर्तिजापूरच्या दौऱ्यावर आहेत. त्यावेळी त्यांनी प्रसारमाध्यमांशी संवाद साधला. त्यावेळी त्यांनी आदित्य ठाकरेंवर मोठं विधान केलं. रोहित पवार म्हणाले, 'मी युवावर्गाला आजही म्हणतोय, त्यांनी पुढे यायला पाहिजे. पक्षाच्या नेत्यांनी सुद्धा युवावर्गाला संधी द्यायला पाहिजे. पक्षाची धुरा कुणी कुणाला देत नसतो. त्यासाठी काम करावे लागते. वरिष्ठांच्या विश्वासाने मिळवावी लागते. दरम्यन शिवसेनेच्या बाबतीत जो अन्याय झाला आहे, तो पैशांच्या जोरावर झाला आहे. आदित्य ठाकरे यांना नक्कीच सहानुभूती मिळणार आहे'.

मनीष सिसोदिया यांच्या निवासस्थानावर सीबीआयने छापा टाकला, त्यावर देखील रोहित पवार यांनी भाष्य केलं. 'मनीष सिसोदिया यांना मी प्रत्यक्ष भेटलो आहे. त्यांचे काम चांगले आहे. त्यामुळे अशा चांगल्या व्यक्तीवर सुडातून कारवाई होत असेल तर कारवाईचा विरोध झालाच पाहिजे. त्यामुळे माझा मनीष सिसोदिया यांना पाठिंबा आहे'.

'कोणत्याही बोटीला एक क्षमता असते. त्या बोटीची क्षमता संपली की त्या पक्षातील नेत्यांना निर्णय घ्यावा लागेल, असा टोला रोहित पवार यांनी भाजपला लगावला आहे. तर आमच्या तीन चाकाच्या रिक्षाला सामान्य माणूस मानतो असेही आमदार पवार म्हणाले.