मुंबई : एकनाथ शिंदे (Eknath Shinde) यांनी मुख्यमंत्रीपदाची तर देवेंद्र फडणवीस यांनी उपमुख्यमंत्रीपदासाठी आज ३० जूनला शपथ घेतली. त्यानंतर राजकीय वर्तुळातून अनेक प्रतिक्रिया येऊ लागल्या. विधान परिषदेचे राष्ट्रवादीचे आमदार एकनाथ खडसे (Eknath khadse) यांनीही माध्यमांशी बोलताना उपमुख्यमंत्री देवेंद्र फडणवीस (Devendra fadnavis) यांच्यावर निशाणा साधला आहे. देवेंद्र फडणवीस हे आपल्या ज्युनिअर मंत्र्याच्या हाताखाली उपमुख्यमंत्री म्हणून काम करतील असं स्वप्नातही वाटलं नव्हतं, असं विधान करत खडसे यांनी फडणवीसांवर हल्लाबोल केला आहे.

एकनाथ खडसे यावेळी माध्यमांशी बोलताना म्हणाले, एकनाथ शिंदे हे मुख्यमंत्री आणि देवेंद्र फडणवीस उपमुख्यमंत्री झाल्याबद्दल दोघांनाही माझ्या शुभेच्छा. फडणवीसांनी मागील सरकारपेक्षा आता अधिक चांगलं काम करावं आणि महाराष्ट्रातील जनतेच्या अपेक्षांची पूर्तता करावी. देवेंद्र फडणवीस यांना मुख्यमंत्री होण्याची खूप मोठी अपेक्षा पूर्ण झाली नाही. परिस्थितीनुसार त्यांनी स्वीकारलं. महाराष्ट्रात घडलेलं नाट्य हे अनपेक्षित आहे.

महाराष्ट्राच्या राजकारणाला गेल्या काही दिवसांपासून वेगळं वळण लागलं होतं. एकनाथ शिंदे गट आणि महाविकास आघाडीच्या सरकारमध्ये जोरदार सत्तासंघर्ष सुरु होता. मात्र,उद्धव ठाकरे यांनी काल मुख्यमंत्रीपदाचा राजीनामा दिल्याने राज्यात भाजप आणि एकनाथ शिंदे गटाची सत्ता येईल, हे जवळपास निश्चितच झालं होतं. याच पार्श्वभूमीवर अखेर एकनाथ शिंदे यांनी मुख्यमंत्रीपदाची तर देवेंद्र फडणवीस यांनी उपमुख्यमंत्रीपदासाठीस शपथ घेतली.

Edited By - Naresh Shende