सोलापूरच्या माढा तालुक्यातील राजकारण पुन्हा एकदा गाजत आहे. अवैध मुरूमांचे उत्खनन प्रकरणी चर्चेत आलेल्या राष्ट्रवादी काँग्रेस पक्षाचे अध्यक्ष बाबा जगताप यांचा आणखी एक कारनामा समोर आला आहे. यांचा एक धक्कादायक व्हिडिओ व्हायरल होत आहे. व्हायरल झालेल्या व्हिडिओमध्ये बाबा जगताप आपल्या कार्यालयात बसून अंमली पदार्थांचे सेवन करताना दिसत आहे. हा व्हिडिओ सध्या सोशल मीडियावर व्हायरल होत असून, नेटकऱ्यांनी संताप व्यक्त केला आहे.

उपमुख्यमंत्री अजित पवार आणि आयपीएस अधिकारी अंजना कृष्णा यांच्यातील मोबाईल संभाषणचा व्हिडिओ व्हायरल झाला होता. या प्रकरणावरून अजित पवारांनी ट्विट केलं होतं. या प्रकरणाच्या केंद्रस्थानी असलेल्या बाबा जगताप या राष्ट्रवादी काँग्रेस पदाधिकाऱ्याच्या नव्या व्हायरल व्हिडिओमुळे आणखी अडचणी वाढल्या आहेत.

कुर्डू येथे बेकायदेशीर मुरूम उत्खनन थांबवण्यासाठी कारवाईस गेलेल्या आयपीएस अंजना कृष्णा यांना अजित पवार यांनी फोनवरून थांबवण्याच्या सूचना दिल्याचा आरोप झाला होता. त्यावेळी अजित पवार यांना फोन लावून देणारे व्यक्ती म्हणजे बाबा जगताप. अजित पवारांनी फोनद्वारे महिला पोलीस अधिकाऱ्याला तंबी दिली होती. आता बाबा जगताप यांचा व्हिडिओ समोर आला आहे.

त्यांचा नशेचा व्हिडिओ समोर आल्यानंतर बाबा जगताप यांच्यावर कारवाईची मागणी जोर धरत आहे. या घडामोडींमुळे मोठे राजकीय नुकसान होण्याची शक्यता आहे.