नवी मुंबई : हार्बर लाईनवरील नेरुळ-उरण लोकल सेवा जवळपास दोन तासापासून ठप्प असल्याची बातमी समोर आलीय. बेलापूर येथील रेतीबंदरजवळ ही लोकल बंद पडली आहे. ब्रिजवर ट्रेन बंद पडल्याने प्रवाशांचे हाल होत असल्याचं समोर आलं आहे. सायंकाळच्या सहा वाजल्यापासून ही लोकल रेतीबंदर येथे बंद पडून उभीये. रेल्वे ट्रॅकमध्ये काही तांत्रिक बिघड झाल्यामुळे ही लोकल बंद असल्याचं सांगण्यात येतंय. रेल्वे कर्मचाऱ्यांचे रेल्वे सेवा पूर्ववत करण्यासाठी शर्थीचे प्रयत्न सुरु आहेत. कामावरुन घरी निघालेला चाकरमान्यांचे मात्र हाल होत असल्याचं दिसत आहे.

दरम्यान, ऐन पुलावर लोकल थांबल्याने प्रवाशांची चांगलीच गैरसोय झालेली दिसत आहे. काही प्रवाशांनी तर पायी आपल्या घराची वाट धरलीय. पुलावर लोकल बंद पडल्याने बरेच प्रवाशी लोकलच्या खाली देखील उतरत नाहीयत.