भोंदूबाबा अशोक खरात प्रकरणाने महाराष्ट्रात खळबळ उडाली आहे. शेकडो महिलांचं लैंगिक शोषण करणाऱ्या अशोक खरातचे पाय राज्य महिला आयोगाच्या अध्यक्ष रुपाली चाकणकर यांच्याकडून धुतानाचा व्हिडिओ व्हायरल होत आहे. भोंदूबाबा खरात आणि चाकणकराचे अनेक व्हिडिओ समोर आल्यानंतर कारवाईची मागणी होऊ लागली आहे. या संपूर्ण प्रकरणावर राष्ट्रवादी काँग्रेसचे प्रदेशाध्यक्ष सुनील तटकरे यांची पहिली प्रतिक्रिया समोर आली आहे.

अशोक खरात प्रकरणात रुपाली चाकणकरांनी राजीनामा देण्याची मागणी विविध राजकीय नेत्यांकडून केली जात आहे. या प्रकरणाचा निर्णय उद्या होणार असल्याची माहिती मिळत आहे. तर उपमुख्यमंत्री सुनेत्रा पवार या जिजाई बंगल्याच्या बाहेर पडून मुंबईसाठी रवाना झाल्या आहेत. यादरम्यान राष्ट्रवादी काँग्रेसचे प्रदेशाध्यक्ष सुनील तटकरे यांनी प्रतिक्रिया दिली आहे.

सुनील तटकरे म्हणाले, ' नाशिकच्या अशोक खरात प्रकरणातील काही माहिती उद्विग्न करणारी आहे. देवाच्या आणि श्रद्धेच्या नावाने अशा काही गोष्टी होतील, याची कल्पना मी किंवा कोणीच कधीही करू शकत नाहीये. सार्वजनिक जीवनात वावरताना प्रत्येकाचाच अनेक व्यक्ती आणि संस्थांशी संपर्क येतो'.

'अनेकदा संपर्क थेट स्वरूपाचे असतेच असे नाही. परंतु याचा अर्थ असा नाही की, एखादे गुन्हेगारी कृत्य करणाऱ्या व्यक्तीला पाठिशी घातले जाईल. आता या प्रकरणातील पीडित महिलांनी समोर येऊन पोलिसांत तक्रार नोंदवावी. महायुती सरकार या प्रकरणात ठाम भूमिका घेईल. तसेच दोषींवर कठोरात कठोर कारवाई करेल. राष्ट्रवादी काँग्रेसच्यावतीने सुद्धा या प्रकरणाच्या निष्पक्ष तपासाच्या दृष्टीने काय पावलं उचलायला हवीत ती आम्ही उचलू, असे तटकरेंनी सांगितले.