अजय सोनवणे 

मनमाड (नाशिक) : घराच्या बाहेर लावलेल्या मोटारसायकलींच्या पेट्रोल नळी काढून त्यांना जाळ्याची घटना मनमाड शहरातील वेगवेगळ्या भागात घडल्या आहेत. रात्रीच्या सुमारास एका माथेफिरूने हा प्रकार केला असून शहरात ६ मोटरसायकली पेटवून दिल्यामुळे खळबळ उडाली आहे. दुचाकी जाळतानाचा हा संपूर्ण प्रकार सिसिटीव्हीत कैद झाला आहे. 

नाशिक जिल्ह्यातील मनमाड शहरात रात्रीच्या सुमारास हा प्रकार घडला असून एका माथेफिरू समाज कंटकाने आज पहाटेच्या सुमारास धुमाकूळ घालत वेगवेगळ्या भागात जाऊन मोटारसायकल जाळल्या आहेत. घराबाहेर उभ्या असलेल्या ६ मोटरसायकल पेटवून दिल्याची घटना मनमाड शहरात घडली असून या घटनेमुळे एकच खळबळ उडाली आहे. 

रोहित जगताप असे या माथेफिरूचे नाव असून त्याने सुरवातीला दुचाकीच्या पेट्रोल टाकीची नळी काढून टाकली होती. टाकीतील पेट्रोल खाली सांडल्यानंतर त्याने आग लावल्याचा थरार सिसिटीव्हीत कैद झाला आहे. दरम्यान या माथेफिरूने असा प्रकार कोणत्या कारणातून केला याचे कारण समोर आलेले नाही. दरम्यान मोटारसायकल जाळल्याने यात मोठे आर्थिक नुकसान झाले आहे. 

आग लावणाऱ्याला अटक 

या प्रकरणी दुचाकीचे नुकसान झालेल्या दुचाकीधारकांनी पोलिसात तक्रार देण्यात आली होती. यानंतर पोलिसांनी रोहित जगताप यास अटक करून त्याच्या विरुद्ध गुन्हा दाखल करण्यात आला आहे. मात्र त्याने हे कृत्य का केले? आणि त्याच्या सोबत आणखी कोण होतं याचा पोलिस तपास करीत आहे.