नाशिक-पेठ राष्ट्रीय महामार्गावरील आंबेगन शिवारात दोन कार भीषण अपघात झाला. दोन कारची समोरासमोर धडक झाली. हा अपघात इतका भीषण होता की, दोन्ही वाहनांचा अक्षरशः चक्काचूर झालाय. भयानक दुर्घटनेत चार प्रवाशांचा जागीच मृत्यू झाला. तर ६ महिला गंभीर जखमी झाल्या आहेत.

मिळालेल्या माहितीनुसार, एका कारमधील व्यक्ती हे गुजरातच्या वापी येथील होते. शिर्डी येथील साईबाबांचे दर्शन घेऊन ते आपल्या कारने नाशिकमार्गे परतत होते. दुपारी साडेतीन वाजेच्या सुमारास आंबेगन शिवारात त्यांच्या कारची समोरून येणाऱ्या दुसऱ्या कारशी धडक झाली.

या अपघातात चार प्रवाशांचा जागीच मृत्यू झालाय. मृतदेह दिंडोरी ग्रामीण रुग्णालयात पाठवण्यात आले आहेत. अपघातातील सहा जखमी महिलांना तात्काळ नाशिकच्या शासकीय जिल्हा रुग्णालयात दाखल करण्यात आले. यापैकी चार महिलांची प्रकृती अत्यंत चिंताजनक असून त्यांच्यावर अतिदक्षता विभागात उपचार चालू आहेत.

अपघाताची माहिती मिळताच स्थानिक नागरिकांनी आणि पोलिसांनी घटनास्थळी धाव घेतली. दोन्ही वाहने एकमेकांत अडकल्यामुळे प्रवाशांना बाहेर काढण्यासाठी मोठी कसरत करावी लागली. या अपघातामुळे महामार्गावरील वाहतूक काही काळ विस्कळीत झाली होती. पोलिसांनी अपघातग्रस्त वाहने बाजूला काढून रस्ता मोकळा केला आहे.