अजय सोनवणे 
नाशिक : कांद्याच्या दरात सातत्याने घसरण होत आहे. यामुळे कांदा उत्पादक शेतकरी हवालदिल झाला असून कांदा दर वाढीची मागणी केली जात आहे. मात्र शासनाकडून कोणताही निर्णय होत नसल्याने शेतकऱ्यांमध्ये असंतोष आहे. तर देवळा येथे शेतकऱ्यांकडून अनोखे आंदोलन करण्यात आले असून ढोल वाजवत मोफत कांद्याचे वाटप यावेळी करण्यात आले. 

नाशिक जिल्ह्यात सर्वत्र नगदी पिक म्हणून मोठ्या प्रमाणात कांदा पिकवला जातो. शेतकऱ्यांना शास्वत पिक म्हणून कांदा पिकावर अवलंबून राहवे लागते. गेल्या काही दिवसांपासून केंद्र सरकाच्या निर्याती बाबतच्या धरसोडीमुळे कांद्याचे भाव गडगडले आहे. त्यामुळे हातात आलेला कांदा मातीमोल भावात शेतकऱ्यांना विकावा लागत आहे. यातून शेतकऱ्यांचा खर्च निघणे देखील कठीण झाला आहे. यामुळे शेतकऱ्यांमध्ये नाराजी आहे.  

कांदा उत्पादनासाठी झालेला उत्पादन खर्च देखिल वसूल होत नाही. इतकेच नाही तर कांद्याच्या दरात वाढ होईल; या आशेने शेतकऱ्यांनी चाळीमध्ये कांदा साठवणूक करून ठेवला आहे. मात्र हा कांदा देखील किती दिवस साठवून ठेवायचा असा प्रश्न देखील आहे. दरम्यान दरवाढीच्या मागणीसाठी राज्यात अनेक ठिकाणी आंदोलन करण्यात येत आहे. त्यानुसार देवळा येथे देखील शेतकऱ्यांकडून अनोखे आंदोलन करण्यात आले. 

कांद्याच्या गोण्या वाटप 

देवळा तालुक्यातील शेतकऱ्यांनी केंद्र व राज्य शासनाचा निषेध म्हणून शेतकरी बांधव मोरया प्रतिष्ठान देवळा यांनी संयुक्तिकरित्या  देवळा येथील पाचकंदिल चौकात आंदोलन केले. येथे कांद्याचे ट्रॅक्टर आणून ढोल वाजवत रस्त्यावरून येणाऱ्या जाणाऱ्या नागरिकांना गोणी भरून मोफत कांद्याचे वाटप करत आहेत. या अनोख्या आंदोलनामुळे सर्वत्र चर्चेचा विषय ठरला आहे