अजय सोनवणे 

मनमाड (नाशिक) : पतंग उडविताना नायलॉन मांजा वापरावर बंदी असताना देखील याचा वापर होत असल्याचे पाहण्यास मिळत आहे. या नायलॉन मांजामुळे दुचाकीवरून जाणाऱ्या एकजणाचा गळा व दोन बोटे कापली गेली आहेत. सदरची घटना नाशिकच्या सिन्नर परिसरात घडली आहे. 

नाशिकच्या सिन्नर येथील सरदवाडी रस्त्यावरुन दुचाकीवरुन जाणारे नंदकुमार निगोजी मोटे (वय ५०) असे जखमी झालेल्या व्यक्तीचे नाव आहे. नंदकुमार मोटे हे दुचाकीने संगमनेर नाका परिसरातून जात असतांना पतंगासाठी वापरला जाणारा नायलॉन मांज्या त्यांच्या गळ्यात अडकला. गळ्यात अडकलेला मांजा त्यांनी हाताने काढण्याचा प्रयत्न केल्यानंतर त्यांच्या हाताची दोन्ही बोटे कापली गेली. 

गळ्यालाही झाली जखम 

तर गळ्यात अडकलेला मांजा काढत असताना गळ्याला देखील खोल जखम होऊन ते गंभीर झाले. यानंतर त्यांना तातडीने हॉस्पिटलमध्ये उपचारासाठी दाखल करण्यात आले. त्यानंतर त्यांच्या गळ्यावर ३५ टाके टाकण्यात आले. एकुणच बंदी असूनही मकर संक्रात पुर्वीच नायलॉन मांज्याचा वापर होत असल्याच समोर आले आहे. 

कारवाईनंतरही मांजाचा वापर 

नायलॉन मांजा वापर करण्यावर बंदी घालण्यात आली आहे. दरम्यान मकरसंक्रांतीच्या पार्श्वभूमीवर पतंग उडविले जात असून यासाठी बाजारात मांजा विक्रीसाठी येत आहे. नाशिकमध्ये यापूर्वी मांजा विक्री करणाऱ्यांना पकडत कारवाई करण्यात आली होती. यानंतरही मांजा विक्री होऊन वापरला जात आहे.