नाशिक : कांदा उत्पादक शेतकरी संघर्ष समितीच्या वतीने आज नाशिकच्या जिल्हाधिकारी कार्यालयावर आंदोलन करण्यात आले. कांद्याच्या मुद्द्यावर चर्चेसाठी आलेल्या शेतकऱ्यांच्या शिष्टमंडळाला अधिकाऱ्यांनी वेळ न दिल्याने शेतकरी संतप्त झाले होते. या शेतकऱ्यांनी जिल्हाधिकाऱ्यांच्या दालनासमोर कांदा फेकून आपला रोष व्यक्त केला. तसेच थेट जिल्हाधिकाऱ्यांच्या दालनाबाहेर कांदे फोडून आपला निषेध व्यक्त केला. 

नाशिक जिल्हाधिकारी कार्यालयात कांदा उत्पादक शेतकरी संघर्ष समितीचे काही पदाधिकारी आज कांद्याच्या मुद्यांवर चर्चा करण्यासाठी आले होते. मात्र या ठिकाणी या शिष्टमंडळाला भेटण्यासाठी अधिकारी वेळ देत नसल्याने शेतकरी संतप्त झाले होते. दरम्यान या शेतकऱ्यांनी जिल्हाधिकारी यांच्या दालनाच्या बाहेरच कांदे फोडून रोष व्यक्त करत घोषणाबाजी देखील केली. हातात कांदे घेऊन शेतकऱ्यांनी सरकारच्या कांदा विरोधी धोरणांचा निषेध केला. 

ठिय्या मांडून कांदा भाकर आंदोलन 

दरम्यान आक्रमक शेतकऱ्यांनी जिल्हाधिकाऱ्यांच्या दालनाबाहेरच घोषणाबाजी करायला सुरुवात केल्याने पोलिसांनी आंदोलकांची धरपकड सुरू केली. यामुळे आंदोलक आणखी आक्रमक झाले. तर आंदोलकांनी थेट निवासी जिल्हाधिकाऱ्यांच्या दालनाबाहेरच पुन्हा एकदा कांदे फोडले. तसेच आपल्या सोबत आणलेली शिदोरी सोडून निवासी जिल्हाधिकाऱ्यांच्या दालनाबाहेर ठिय्या मांडून कांदा भाकर आंदोलन सुरू केले.  

या सर्व परिस्थितीमुळे काही काळ जिल्हाधिकारी कार्यालयात गोंधळाचे वातावरण निर्माण झालं होतं. तर गेल्या काही दिवसांपासून कांद्याच्या दरात मोठ्या प्रमाणात घसरण सुरू असल्याने बाजार हस्तक्षेप योजना राबवण्याची तसेच कांद्याला उत्पादन खर्चावर आधारित रास्त भाव देण्याची मागणी शेतकरी कृती समितीने केली आहे. दरम्यान आक्रमक कांदा उत्पादक शेतकऱ्यांची निवासी जिल्हाधिकारी रोहित राजपूत यांनी भेट घेत समजूत काढली.