Crime News Nashik : नाशिकमध्ये किरकोळ कारणातून जीवघेणे हल्ले सुरूच असून, आज पुन्हा एकदा पंचवटी परिसरातील पेठरोड भागात कौंटुबिक वादातून जावयाने आपल्या सासूसह साळीवर धारदार विळ्याने वार करत गंभीर जखमी केल्याची घटना घडली आहे.

या हल्ल्यात साळी गंभीर जखमी झाली असून सासू देखील जखमी झाली आहे. आरती वालझाडे असे गंभीर जखमी झालेल्या महिलेचे नाव असून, या दाेघींवर नाशिकच्या जिल्हा शासकीय रुग्णालयात उपचार सुरु आहेत. (Latest Marathi News)

पेठरोड दिंडोरी (Nashik) नाक्यावरील अभिषेक स्विटस् मागे ही घटना घडली आहे. या हल्ल्यात आरती वालझाडे ही महिला गंभीर जखमी झाली आहे. सासू अरुणा लोखंडे यांनी पोलिसांना दिलेल्या तक्रारीनुसार, त्यांचा जावई संशयित मनोहर मोंढे याचे पत्नीसोबत कौटुंबिक वाद सुरु आहेत.

या वादास आरती वालझाडे कारणीभूत असल्याचा आरोप करीत जावई मनोहर मोंढे आणि अरुणा यांचा मुलगा मनिष लोखंडे याने आरतीवर हल्ला केला. आरती ही अरुणा यांची दत्तक घेतलेली मुलगी असल्याची माहिती समोर आहे.

यात मनोहरने विळ्याने वार केल्याने आरतीला गंभीर दुखापती झाल्या आहेत. त्यानंतर त्यांना 108 रुग्णवाहिकेने तातडीने जिल्हा रुग्णालयात दाखल करण्यात आले. घटनेची माहिती मिळताच पंचवटीचे वरिष्ठ पोलीस निरीक्षक डॉ. सीताराम कोल्हे यांनी जिल्हा रुग्णालयात (Hospital) जाऊन जखमींची चौकशी केली, तर दोघा संशयितांना पंचवटी पोलिसांनी (Police) ताब्यात घेतले आहे.

Edited By - Shivani Tichkule