अभिजीत सोनावणे, नाशिक

Nashik Kashyapi Dam Drowning Incident Family Drown नाशिक जिल्ह्यातील कश्यपी धरण परिसरात सुट्टीचा आनंद घ्यायला गेलेल्या एका कुटुंबावर काळाने झडप घातली आणि चार जणांचा दुर्दैवी मृत्यू झाला. या घटनेमुळे संपूर्ण परिसरात हळहळ व्यक्त केली जात आहे.नाशिकमधून काळजाचा थरकाप उडवणारी बातमी समोर आली आहे. मे महिन्याच्या उन्हाळी सुट्टीत धरणावर आनंद लुटण्यासाठी गेलेल्या कुटुंबावर काळाने घाला घातला आहे. नाशिक जिल्ह्यातील कश्यपी धरण परिसरात एका कुटुंबाचा बुडून मृत्यू झाला आहे. मृतांमध्ये पती पत्नी आणि दोन लहान मुलं आहेत. दुर्दैवी बाब म्हणजे मृत स्त्री गरोदर असल्याची माहिती आहे. या घटनेने मृतांच्या कुटुंबियांवर दुःखाचा डोंगर कोसळला आहे.

मिळालेल्या माहितीनुसार, सचिन ठोंबरे, रोहिणी ठोंबरे अशी मृत पती पत्नींची नावे असून दोन मुले ही ठोंबरे कुटुंबियांच्या शेजारी राहणारी होती. हे चौघेही मखमलाबाद नाका येथील रहिवाशी होते ठोंबरे कुटुंब सुट्टीचा दिवस साजरा करण्यासाठी कश्यपी धरण परिसरात गेले होते. मात्र, पाण्याचा अंदाज न आल्याने ही दुर्दैवी दुर्घटना घडली असल्याचा प्राथमिक अंदाज आहे.

आजूबाजूला उपस्थित असलेल्या नागरिकांनी तात्काळ मदतीचा प्रयत्न केला, मात्र पाण्याची खोली जास्त असल्यामुळे सुरुवातीला त्यांना यश आले नाही. दरम्यान, परिसरात उपस्थित असलेल्या एका धाडसी महिलेने ठोंबरे दाम्पत्याची अवघी २ वर्षांची मुलगी पाण्याकडे जात असल्याचे तिच्या लक्षात आले. क्षणाचाही विलंब न करता तिने त्या मुलीला उचलून सुरक्षित ठिकाणी नेले आणि तिचा जीव वाचवला.

घटनेनंतर स्थानिक तरुणांनी तत्परता दाखवत खोल पाण्यात उड्या घेत शोधकार्य सुरू केले. बराच वेळ प्रयत्न केल्यानंतर चौघांचे मृतदेह बाहेर काढण्यात आले. या घटनेची माहिती मिळताच पोलिस आणि आपत्कालीन पथक घटनास्थळी दाखल झाले. या दुर्घटनेमुळे परिसरात शोककळा पसरली असून, पर्यटकांनी पाण्याजवळ जाताना अधिक काळजी घेण्याचे आवाहन प्रशासनाने केले आहे. तसेच, धरण परिसरात सुरक्षिततेचे नियम पाळणे अत्यावश्यक असल्याचेही अधोरेखित करण्यात आले आहे.